नेकपा एमालेले राष्ट्रपति निर्वाचनमा आफ्ना उम्मेदवार सुवास नेम्वाङलाई जिताउन लोकतान्त्रिक समाजवादी पार्टी (लोसपा)सँँग भोट मागेको छ ।

अहिले ८ दलीय गठबन्धनमा रहेको लोसपाले भने २४ गते कार्यकारिणी समितिको बैठक बसेर निर्णय दिने बताएको छ । 

उम्मेदवार सुवास नेम्वाङसहित एमाले नेताहरूले शुक्रवार लोसपा अध्यक्ष महन्थ ठाकुरलाई भेटेर भोट मागेका हुन् ।

लोसपासँगको भेटपछि एमाले सचिव योगेश भट्टराईले नेम्वाङको उम्मेदवारीप्रति लोसपा सकारात्मक रहेको बताएका हुन् । ‘राष्ट्रपति निर्वाचनमा नेम्वाङको उम्मेदवारी न्यायोचित भएकोले भोट दिन आग्रह गरेका छौं । २४ गते बैठक बसेर निर्णय गर्ने सकारात्मक प्रतिक्रिया पाएका छौं’, भट्टराईले भने । 

राष्ट्रपतिको चुनावमा गठजोड बनाएर राजनीतिलाई विभाजित गर्नु नहुने उनले बताए ।

‘अहिलेका आठ दल अस्थायी हुन, कुनै सिमेन्टेड होइन । सचेत मतदाता भएकोले चुनावमा विवेक प्रयोग हुन्छ, ह्वीप लाग्दैन । हाम्रो उम्मेदवारले जित्नेमा विश्वस्त छौं’ योगेशले भने । 

राष्ट्रपतिको चुनाव फागुन २५ गते हुँदैछ ।