प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’विरुद्ध सर्वाेच्च अदालतमा दर्ता भएको रिट निवेदनमा अपराध स्वीकार भइसकेको दाबी गरिएको छ ।

मंगलवार सर्वाेच्चमा दर्ता भई बिहीवारका लागि पेशी तोकिएको रिट निवेदनमा प्रचण्डले सार्वजनिक अभिव्यक्ति नै दिएर अपराध स्वीकार गरिसकेको दाबी गरिएको छ ।

रिट निवेदनमा उल्लेख छ, ‘व्यक्ति हत्या अपराध हो र यसबाट उन्मुक्ति मिल्दैन । दोषी पत्ता लगाएर कारवाही गर्ने कुरा राज्यको कर्तव्य र दायित्व भित्रका कुरा हुन् । यस निम्ति राज्यसँग समक्ष संयन्त्र रहेको कुनै र ती संयन्त्रको प्रभावकारी परिचालन गर्ने क्रममा कानूनले निर्दिष्ट गरेको दायित्वबाट राज्य पन्छिन पाउने अवस्था नहुने नजीर पनि स्थापित भएको छ । हालको अवस्था प्रचण्डले साबिती बयान दिएको त्यो पनि ५००० को हत्याको जिम्मेवारी लिएर । प्रचण्डलाई सजाय नगरिँदा विधिको शासन कमजोर हुने र पीडितको प्रभावकारी उपचारको हकमा आघात पुग्ने एवं पीडितको संवैधानिक र कानूनी हक हनन् हुन जाने स्पष्ट छ । अपराधी हुँ भनेर स्वीकार गर्दा पनि कारवाही नगर्नु अन्तर्राष्ट्रिय कानूनको बाध्यात्मक नियम विपरीत हुनेछ ।’

रिटमा अगाडि भनिएको छ, ‘प्रचण्डको साबिती बयानले निजलाई कारवाही गर्नुको विकल्प नै छैन । द्वन्द्वको राजनीतिक सम्बन्धको कुरा जे भए पनि तिनको कानूनी पक्षलाई उपेक्षा गर्न मिल्दैन ।’

रामेछापको मन्थली नगरपालिका–१२ निवासी कल्याण बुढाथोकी समेतले दायर गरेको रिटमा प्रचण्ड, प्रधानमन्त्री कार्यालय, सत्य निरुपण तथा मेलमिलाप आयोग र प्रहरी प्रधान कार्यालय समेतलाई विपक्षी बनाइएको छ ।