नेकपा एमालेका अध्यक्ष केपी शर्मा ओलीले सरकारको नेतृत्वकर्ता दल नेकपा माओवादी केन्द्रको दोहोरो भूमिकाप्रति आपत्ति जनाएका छन् ।

बन्दुकमा खियाँ लागेको छैन भनेर माओवादीका नेताहरूले दिएको अभिव्यक्ति आपत्तिजनक भएको उनले बताए । 

मानव अधिकार एलायन्सको सम्मेलनलाई मंगलवार काठमाडौंमा सम्बोधन गर्दै ओलीले सरकारमा बसेको दलले नै मानव अधिकार आयोगलाई धम्की दिने गरेको आरोप लगाएका हुन् ।

‘बन्दुक खिइएको छैन भनेको के ? सत्तामा हुने, सरकारमा हुने, अर्कोतिर आतंककारी क्रियाकलाप गर्दै जाने ?’ ओलीले प्रश्न गरे । 

मानव अधिकारको उल्लंघनकर्ताले नै मानव अधिकारको पक्षमा चर्को आवाज उठाउने गरेको आरोप लगाए । ‘१० वर्षे हिंसाको समर्थकको मानव अधिकार, भाइलेटरहरूको मानव अधिकार संस्थाको शिलशिला खुब चल्यो,’ ओलीले भने । अहिले आफूहरूले गरेको मानव अधिकार उल्लंघनको घटना ढाकछोप गर्नका लागि मानव अधिकार आयोगलाई धम्क्याएको ओलीले आरोप लगाए । 

‘नेपालको राजनीतिको एक पक्ष आफूले भनेजस्तो भएन भने मानव अधिकार आयोगलाई धम्की दिन्छ । बन्दुकमा खियाँ लागेको छैन भन्छ । हामीले गरेको मानव अधिकार उल्लंघनको कुरा गर्ने भनेर प्रश्न गर्छ,’ माओवादीप्रति कटाक्ष गर्दै ओलीले भने । 

सशस्त्र द्वन्द्वकालीन मुद्दा ब्युताउन खोजिएको भन्दै माओवादी घटकले आयोजना गरेको कार्यक्रममा माओवादी नेता कृष्णबहादुर महराले बन्दुक उठाउने धम्की दिएका थिए ।