विश्वकपको ग्लोबल क्वालिफायरमा स्थान बनाउन सफल राष्ट्रिय क्रिकेट टिमका प्रत्येक खेलाडीलाई बागमती प्रदेश सरकारले पनि नगद रकमसहित पुरस्कृत गर्ने घोषणा गरेको छ। 

बागमती प्रदेशका मुख्यमन्त्री शालिकराम जम्कट्टेलले प्रदेश सरकारको तर्फबाट खेलाडीहरूलाई जनही एक लाख रुपैया दिने शुक्रबार घोषणा गरेका हुन्। 

‘खेलाडीको सम्मान र हौसालाको लागि बागमती प्रदेश सरकारले राष्ट्रिय क्रिकेट टिमका प्रत्येक खेलाडीलाई जनही एक लाख दिने भएका छौं’, उनले भने ।

बागमती प्रदेशका खेलाडीहरूसमेत सम्मिलित उक्त टिमलाई जितको लागि बधाई दिँदै मुख्यमन्त्री जम्कट्टेलले थप प्रगति र सफलताको लागि शुभकामना दिएका छन् । 

नेपालले बिहीबार घरेलु मैदान कीर्तिपुरमा यूएईलाई ९ रनले पराजित गर्दै विश्वकपको ग्लोबल क्वालिफायरमा स्थान बनाएको थियो ।

यसअघि संघ सरकारले पनि क्रिकेट टिमका प्रत्येक खेलाडीलाई जनही ३ लाख रुपैयाँ दिने घोषणा गरेको थियो।