राष्ट्रिय प्रजातन्त्र पार्टीले दलको उपनेतामा बुद्धिमान तामाङलाई चयन गरेको छ। 

शनिवार पार्टीको संसदीय दलको कार्यालय सिंहदरबारमा बसेको संसदीय दलको बैठकले पार्टीको संसदीय दलको विधान पनि टुंग्याएको छ ।

सरकारले कृषि मलमा कटौती गरेको अनुदानकाविरुद्ध बैठकले सरकारलाई ध्यानाकर्षण गराउने निर्णय गरेको छ । बैकठपछि सञ्चारकर्मीसँग कुरा गर्दै राप्रपा अध्यक्ष राजेन्द्रप्रसाद लिङदेनले बैठकले संसदीय दलको विधान पारित गरेको र विधानअनुसार संसदीय दलको उपनेतामा बुद्धिमान तामाङलाई मनोनयन गरेको बताए। 

लिङदेनले राष्ट्रिय प्रजातन्त्र पार्टीले सत्य निरुपण तथा मेलमिलाप आयोगसम्बन्धी विधेयकमा फरक मत राख्ने बताए। उनले यो विधेयक एकपक्षीय रहेको विद्रोही पक्षको लागि मात्रै भएको आरोप लगाए। उनले द्वन्द्वको अर्को पक्षबारे सम्बोधन नभएकाले राप्रपाले यो विधेयकमा संसदमा आफ्नो धारणा राख्ने पनि बताए। 

उनले भन्नुभयो, ‘राष्ट्रिय प्रजातन्त्र पार्टीले सत्य निरुपण तथा मेलमिलाप आयोग सम्बन्धी विधेयक सम्बन्धी फरक मत राख्नेछ । यो विधेयक एक पक्षीय छ । खासगरी बिद्रोही पक्षको लागि मात्रै छ । द्वन्द्वको अर्को पक्ष र तेस्रो पक्ष आम पीडित जनाको पक्षमा सम्बोधन छैन । यसमा हामी संसदमा व्यापक छलफल गर्नेछौँ ।’

पार्टीले संघीय र प्रदेश सांसदहरुलाई संसदमा उपस्थिति जनाउनेबारे प्रशिक्षण पनि दिने निर्णय पनि गरेको छ ।