नेपाली कांग्रेसका महामन्त्री गगन थापाले काठमाडौं महानगरले उठाएको फाेहरकाे विषयलाई आजै संवाद गरेर सुल्झाउन प्रधामनन्त्री पुष्पकमल दाहाल प्रचण्डको ध्यानाकर्षण गराएका छन् ।

अत्यावशयक सेवा अवरोध गर्ने मेयरको शैलीमा बहस गर्न सकिएपनि समस्या समाधानमा प्रधानमन्त्रीले अग्रसरता लिनुपर्ने उनको भनाइ थियो । 

सोमवार बसेको प्रतिनिधि सभा बैठकको शुरुमै सभामुखसँग समय लिएर कांग्रेस सांसद थापाले महानगरसँग कुरा गरेर आजै समस्या सल्टउन आग्रह गरेका हुन् ।

‘बागदरबार (महानगरको कार्यालय) र सिंहदरबारबीच टसल शुरु भएजस्तो देखिन्छ । अत्यावश्यक सेवा अवरोध गर्न मिल्ने कि नमिल्ने बहस गरौंला । तर काठमाडौं महानगरसँग कुरा गरेर अहिले उठेको विषय सल्टाइयोस’ थापाले भने । 

सरकारले फोहर व्यवस्थापनमा सहजीकरण नगरेको भन्दै काठमाडौं महानगरले सिंहदरवार र प्रधानमन्त्री निवासको फोहर उठाउन छाडेको छ । सरकारले सहयोग नगरेको भन्दै महानगरका मेयर बालेन शाहले राजनीतिक दलका नेतालाई सिसडोलमा डम्पिङ गर्नुपर्ने विवादास्पद अभिव्यक्ति दिएका थिए ।