नेपाली कांग्रेसमा डा. शेखर कोइराला पक्षले सरकारमा पठाउने मन्त्री चयनसहित विषयमा छलफल गरेको छ ।

बालुवाटारस्थित डा. शेखर कोइरालाको सचिवालयमा डा. शेखर पक्षका पदाधिकारी र केन्द्रीय सदस्यहरूको बैठकमा मन्त्री चयन सहितका विषयमा छलफल भएको हो ।

‘लामो समय भएको थियो । हाम्रो टीमको बैठक बसेको थिएन । यसैले मन्त्री चयन सहितका विषयमा छलफल गर्न पदाधिकारी र सिनियर नेताहरूको बैठक बसेको हो,’ महामन्त्री गगन थापा थापानिकट स्रोतले भन्यो, ‘हाम्रो पक्षबाट टुंगिन बाँकी मन्त्रीका विषयमा पनि छलफल भएको छ ।’ 

यसअघि आफ्नो पक्षलाई ३ मन्त्रालय नदिइएको भन्दै शेखर पक्षले नाम पठाएको थिएन । यसैले कांग्रेसबाट संस्थापन पक्षका ४ जना सांसदले मात्रै मन्त्रीमा शपथ लिएका थिए । अझै ४ जना मन्त्री चयन गर्न बाँकी छ ।

सभापति देउवाले २ मन्त्री र १ राज्यमन्त्री लिएर सरकारमा सहभागी हुन डा. शेखर पक्षलाई पटक–पटक आग्रह गर्दै आएका छन् तर शेखर पक्षले राज्यमन्त्री नभई मन्त्री नै पाए मात्रै सरकारमा सहभागी हुन नाम पठाउने अडान लिँदै आएको छ । 

ढिलो हुँदा सरकारको कार्यसम्पादनमा नै असर परेपछि छिटो नाम पठाउन शेखर पक्षलाई दबाब परेको छ । शेखर पक्षमा २ मन्त्री र १ राज्यमन्त्री लिएर सहभागी हुने वा नहुनेमा पनि फरक मत समेत रहेको बताइन्छ । यसैले एउटै धारणा तय गर्न समेत शेखर पक्षले बैठक राखेको बुझिएको छ । 

यसअघि शेखर पक्षबाट धनराज गुरुङ र डीगबहादुर लिम्बू मन्त्री बन्ने चर्चा थियो तर ३ मन्त्रालय पाउनुपर्ने भन्दै जीवन परियार, बद्री पाण्डे वा प्रदीप पौडेलमध्ये १ जनालाई मन्त्री बनाउन शेखर पक्षले दबाब बढाएको छ ।