मन्त्री नियुक्तिबारे कांग्रेस र नेकपा एसका शीर्ष नेतासँग प्रधानमन्त्री प्रचण्डको छलफल

प्रधानमन्त्री पुष्पकमल दाहाल ‘प्रचण्ड’ले नेपाली कांग्रेस र नेकपा एकीकृत समाजवादीका शीर्ष नेतासँग छलफल गरेका छन् । 

प्रधानमन्त्री निवास बालुवाटारमा प्रधानमन्त्री प्रचण्डले कांग्रेस सभापति शेरबहादुर देउवा, नेकपा एसका अध्यक्ष माधवकुमार नेपाल सहितका नेतासँग समसामियक राजनीतिका विषयमा छलफल गरेका हुन् । 

‘प्रधानमन्त्रीले कांग्रेस र नेकपा एसका शीर्ष नेतासँग समसामयिक विषयमा छलफल गर्नुभएको छ,’ प्रधानमन्त्रीका प्रेस संयोजक सूर्यकिरण शर्माले भने, ‘उपनिर्वाचनको तयारी, मन्त्रिपरिषद् विस्तारसहित समसामयिक विषयमा कुराकानी भएको बुझिएको छ ।’ 

छलफलबाट कांग्रेसबाट उपसभापति पूर्णबहादुर खड्का र नेकपा एसबाट महासचिव घनश्याम भुसाल पनि सहभागी थिए । 

प्रधानमन्त्री प्रचण्डसँग अझै पनि ६ वटा मन्त्रालय बाँकी छन् । मुख्यगरी कांग्रेसले मन्त्रीमा पठाउने नाम टुंगो लगाउन नसक्दा सरकारले अझै पूर्णता नपाएको हो । 

कांग्रेसले ८ वटा मन्त्रालय पाउने सहमति भएको थियो तर शेखर पक्षलाई सहमतिमा ल्याउन थप १ मन्त्रालय पाउनुपर्नेमा कांग्रेस छ । १ मन्त्रालय थपिँदा कांग्रेसबाट ५ जना मन्त्री थपिनेछन् ।
 
जसमा संस्थापनबाट एनपी साउँद र मोहनबहादुर बस्नेत मन्त्री हुँदैछन् । शेखर पक्षले पनि ३ जना पाउने भएपछि आवश्यक सल्लाहमा नाम बुझाउने तयारी गरेको छ ।
 
शेखर पक्षबाट धनराज गुरुङ र डीगबहादुर लिम्बू मन्त्री बन्दैछन् । थप १ जनाका लागि सहमति जुटिसकेको छैन । 

सहमहामन्त्रीद्वय जीवन परियार र बद्री पाण्डे मुख्य दाबेदार छन् तर मन्त्रीका लागि प्रदीप पौडेल र सुरेन्द्रराज आचार्य पनि दाबेदार देखिएका छन् । 

वैशाख १० गते हुने उपनिर्वाचनपछि मन्त्रिपरिषद्लाई पूर्णता दिने तयारी प्रधानमन्त्री प्रचण्डको छ ।