लुम्बिनी प्रदेश सरकार गठनका लागि प्रदेश प्रमुखले गरेको आह्वान संवैधानिक प्रबन्ध र कानून विपरीत भएको भन्दै नेकपा एमालेले आपत्ति जनाएको छ ।

एमाले प्रमुख सचेतक तुलसी चौधरीले बुधवार विज्ञप्ति जारी गरी प्रदेश प्रमुखबाट कानून विपरीत आह्वान भएको उल्लेख गरेका छन् । 

‘संसदमा सबैभन्दा ठूलो दललाई सरकार गठनका लागि नेपालको संविधानको धारा १६८(३) ले नै प्रबन्ध गरेको परिप्रेक्ष्यमा र धारा १६८(२) बमोजिम गठन भएको सरकारले विश्वासको मत नपाएको अवस्थामा फेरि सोही धारा प्रयोग गर्नु कानूनी रूपमा सही हुँदैन,’ विज्ञप्तिमा भनिएको छ, ‘यो हस्तक्षेपकारी भूमिकाको हामी घोर विरोध गर्दछौं र कानूनी उपचारमा जान्छौं ।’

संविधान र कानूनले दिएको अधिकारलाई पूरै बेवास्ता गरी सरकार गठनका लागि तयारी हुनु भविष्यका लागि समेत गलत नजीर हुने एमालेको ठहर छ । यसलाई सच्याउन र कानूनको पूर्ण पालना गर्न पनि एमालेले आग्रह गरेको छ ।

संविधान र कानून विपरीत जाने कुरा कदापी स्वीकार्य नहुने एमालेले बताएको छ ।