नेकपा एमालेका अध्यक्ष तथा पूर्व प्रधानमन्त्री केपी शर्मा ओलीले आफूहरूले गरिरहेको संस्कृति र शान्तिपूर्ण व्यवहारविरुद्ध केही मानिसले हमला गर्ने र ढुंगा हान्ने गरेको बताएका छन् ।

उनले पहिचानको नाम गरेर हमला गर्ने, ढुंगा हान्ने काम राजनीति नभएर भँडुवा नीति भएको बताए ।

नेकपा एमाले जिल्ला कमिटी ईलामले आयोजना गरेको जिल्ला अधिवेशन प्रतिनिधि परिषद् बैठकको उद्घाटन गर्दै ओलीले ढुंगा हान्ने राजनीति र भँडुवा राजनीति छाडेर शान्तिपूर्ण रूपमा लाग्न पहिचानवादीलाई आग्रह गरे । 

कार्यक्रममा एमालेका उपाध्यक्ष सुवासचन्द्र नेम्वाङले पहिचान र समावेशीताका लागि एमालेले नै अग्रसर भएर लडाइँ लडेको स्मरण गरे ।

अध्यक्ष ओली लगायतका नेतालाई पहिचानवादीले मेची राजमार्गमा अवरोध गरेका थिए । उनीहरूले इलाम बजारमा जुलुस तथा कालोझण्डा देखाएका थिए । प्रदर्शन र कालो झण्डा देखाउने ९ जनालाई प्रहरीले पक्राउ गरी छाडेको थियो ।

कोशी प्रदेश नामकरणको विरोधमा प्रदर्शनकारीले अध्यक्ष ओली लगायतका नेताविरुद्ध नाराबाजी गरेका हुन् ।