नेकपा (एकीकृत समाजवादी)का अध्यक्ष माधवकुमार नेपालले प्रदेश सरकारहरूको नेतृत्वमा आलोपालो हुने बताएका छन् । शुक्रवार समाजवादी प्रेस संगठन नेपाल धनुषाले आयोजना गरेको पत्रकार सम्मेलनमा बोल्दै अध्यक्ष नेपालले प्रदेश सरकारहरुको नेतृत्वमा दलहरुकाबीचमा आलोपालो हुने बताएका हुन् ।

उनले प्रदेश सरकारहरु धमाधम परिवर्तन हुन थालेका भन्दै एकीकृत समाजवादी पनि प्रदेश सरकारमा सामेल हुने बताए । जनमत नै मिलेर सरकार बनाउने उल्लेख गर्दै पार्टीको संख्यात्मक कुरालाई ध्यानमा राखेर गठबन्धनका दलहरुबीचमा बाँडफाँट हुने उनको भनाइ थियो ।

‘कसैकसैले के भन्छन् भने आलोपालो गर्नु हुँदैन । यो संसारमा कहीँ सम्भव छ ? यो कुरा उठाउने मान्छेले पनि मौका पाएको भए छोड्थ्यो ? अरूलाई बडो उपदेश दिने मान्छेहरु । जब जनताले नै तपाईंहरु मिलेर गर्नुस् भनिसकेपछि कुनै एउटा पार्टीको बहुमत नहुँदाखेरी गर्छन् के ?’ उनले भने ।

अध्यक्ष नेपालले समाजवादमा प्रतिवद्ध हुने पार्टीहरुकाबीचमा समाजवादी मोर्चा बनाउने तयारी रहेको बताए । नेकपा (माओवादी केन्द्र), नेकपा (एकीकृत समाजवादी) र जसपा एकताका लागि छलफल भइरहेको उनको भनाइ थियो । विप्लव नेतृत्वको नेपाल कम्युनिष्ट पार्टी लगायतका अन्य पार्टीसँग पनि मोर्चा बनाउने विषयमा छलफल भइरहेको उनले जानकारी दिए ।

कार्यक्रममा उनले एकीकृत समाजवादी एमाले वा अन्य कुनै पार्टीहरुसँग विलय नहुने बताए । वैचारिक एकरूपता र समानताको सिद्धान्तका आधारमा जोसँग पनि हातेमालो गर्दै अगाडि बढ्ने उनको भनाइ थियो ।