राष्ट्रिय स्वतन्त्र पार्टीका सभापति एवं प्रतिनिधिसभा सदस्य रवि लामिछानेले राष्ट्रिय आविष्कार केन्द्रका संस्थापक महावीर पुनको आन्दोलन र धर्ना कार्यक्रममा ऐक्यबद्धता जनाएका छन् ।

पुनले अनुसन्धान, नवप्रवर्तन र आविष्कार तथा अनुसन्धानमा सहयोग गर्न संघ र प्रदेश सरकारले विकास बजेटको एक प्रतिशत रकम छुट्याउन र ‘अनुसन्धान, नवप्रवर्तन र आविष्कार कोष’मा उक्त रकम जम्मा गर्नुपर्ने माग राख्दै शुक्रवारबाट धर्ना शुरु गरेका छन् । 

उनको आन्दोलन तथा धर्ना कार्यक्रमलाई ऐक्यबद्धता जनाउँदै पार्टी सभापति रवि लामिछाने, उपसभापति डी.पी. अर्याललगायतको टोली माइतीघर पुगेको हो ।

सभापति लामिछानेले महावीर पुनको माग पूरा गर्नका लागि रास्वपाका सबै सांसदहरूले संसदमा जोडदाररूपमा आवाज उठाउनुका साथै यस विषयमा हरसम्भव सहयोग गर्ने प्रतिबद्धता गरेका छन् ।