विगत ६ वर्षदेखि ब्ल्याकमेलिङ गर्दै किशोरीलाई बलात्कार गरेको आरोपमा एक जना पक्राउ परेका छन् । पक्राउ पर्नेमा विराटनगर– ६ का ३० वर्षीय मोहमद रिजवान अन्सारी रहेका छन् । उनी स्थानीय व्यवसायी हुन् ।
अन्सारीले विराटनगरकी एक किशोरीलाई २०७४ सालदेखि पटक–पटक बलात्कार गरेको प्रहरी अनुसन्धानबाट खुलेको छ ।

जिल्ला प्रहरी कार्यालय मोरङका अनुसार उनले पहिलोपटक बलात्कार गरेको भिडिओ खिचेको र त्यही भिडियो सार्वजनिक गर्ने धम्की दिँदै निरन्तर यौन शोषण गर्दै आएको खुलेको छ । त्यही भिडियोलाई सामाजिक सञ्जालमा सार्वजनिक गर्ने धम्की दिँदै उनले पटक–पटक बलात्कार गरेको अनुसन्धानबाट खुलेको प्रहरीले जनाएको छ ।

मोरङ प्रहरीका प्रवक्ता डीएसपी रन्जनकुमार दाहालका अनुसार ती किशोरी १५ वर्षको उमेरदेखि बलात्कृत भएको खुलेको छ । ‘अन्सारीले पीडितको भिडियो बनाएको रहेछ । त्यही अश्लील भिडियो सामाजिक सञ्जालमा हालेर भाइरल बनाउने डर÷त्रास देखाएर ब्यालकमेलिङ गर्दै ६ वर्षदेखि बलात्कार गर्दै आएको खुलेको छ,’ डीएसपी दाहालले भने ।

जबरजस्ती करणीबाट किशोरी दुईपटक गर्भवतीसमेत भएकी थिइन् । तर युवकले विभिन्न डर धम्की देखाएर गर्भपतन गाएको अनुसन्धानबाट खुलेको छ । किशोरीको अश्लील भिडियो अन्सारीले नक्कली फेसबुक आइडी बनाएर हाल्ने गरेको प्रहरीले जनाएको छ ।

आफूले भनेका नमाने भिडियो सामाजिक सञ्जालमा हालेर भाइरल गराउने डर त्रास देखाउने गरेको पीडित किशोरीले दिएको जाहेरीमा समेत उल्लेख गरिएको अनुसन्धानमा खटिएका प्रहरी अधिकृतहरुले बताएका छन् ।
प्रवक्ता दाहालका अनुसार उनीविरुद्ध जबरजस्ती करणी, गर्भ संरक्षणको कसुर र विद्युतीय कारोबार ऐनमा म्याद थप गरी अनुसन्धान भइरहेको छ ।