एक महिना नपुग्दै नेपालमा ३ वटा हेलिकप्टर दुर्घटनामा परेका छन् । शुक्रवार सिम्रिक एयरको हेलिकप्टर संखुवासभामा दुर्घटना भएको छ ।

अरुण तेस्रो जलविद्युत आयोजनाको लागि सामान पुर्‍याएर फर्कने क्रममा ९एन एजेजेड कलसाइनको हेलिकप्टर दुर्घटना हुँदा क्याप्टेन सुरेन्द्र पौडेल र सिम्रिककै कर्मचारी छिरिङ भोटे घाइते भए । एक जनाको मृत्यु भएको छ ।
घाइतेको सिम्रिकको अर्को हेलिकप्टरबाट उद्धार गरेर काठमाडौंको मेडिसिटी हस्पिटलमा ल्याएर उपचार भइरहेको छ ।

यस अघि २६ चैतमा धौलागिरि बेसक्याम्प नजिकै एभरेस्ट हेलीको ९एन एएनबी कलसाइनको हेलिकप्टर दुर्घटना परेको थियो । उक्त हेलिकप्टरले पनि कार्गो बोकेर अवतरण गर्ने क्रममा अनियन्त्रित भएर पल्टिएको थियो । उक्त दुर्घटनामा हेलिकप्टर चालक प्रिया अधिकारी सामान्य घाइते भएकी थिएन् ।

हेली एभरेष्टको उक्त हेलिकप्टर दुर्घटनामा परेको ४ साता बितिसक्दासमेत धौलागिरि आधार शिविरमै पल्टिरहेको छ ।

यो हेलिकप्टरको निरीक्षण नसकिएको, बीमाको टोली नपुगेको कारण दुर्घटना हुँदा जुन अवस्थामा पल्टिएको थियो अहिलेसम्म सोही अवस्थामा रहेको संस्कृति, पर्यटन तथा नागरिक उड्डयन मन्त्रालयबाट गएको निरीक्षण टोलीका एक सदस्यले बताए ।

उनका अनुसार मौसम अनुकूल नभएको कारण लामो समय निरीक्षणमा पुग्नै लागेको थियो भने थप विवरण संकलनको काम भइरहेको छ ।

हेलिकप्टरको प्रारम्भिक निरीक्षण सरकारी टोलीले गरिसकेको भए पनि बीमाको टोली नपुग्दा हेलीबाट सामान निकाल्ने तथा मर्मतको लागि आवश्यक प्रक्रिया अगाडि बढाउन नपाएको हेली एभरेष्टले जानकारी दिएको छ ।

हेली एभरेष्टको दुर्घटना भएको अघिल्लो दिन २५ चैतमा ह्याम्स हस्पिटलको छतमा अवतरण गर्ने क्रममा एयर डाइनेष्टिको अर्को एक हेलिकप्टर पनि दुर्घटनामा परेको थियो ।

भरतपुरमा बिरामी लिन जाने क्रममा हेलिकप्टर मेडिकल टीमको लागि ह्याम्स हस्पिटल पुगेको थियो । हेलिकप्टर अवतरण गर्ने क्रममा पुच्छरले छोएका कारण दुर्घटना भएको थियो । ह्याम्समा भएको सामान्य घटना भएकोले उक्त हेलिकप्टर मर्मत भइरहेको प्राधिकरणले जानकारी दिएको छ ।

शुक्रवार भएको सिम्रिक एयरको दुर्घटना भने पछिल्लो एक महिनामा भएको घटनामध्ये बढी गम्भीर प्रकृतिको हो । ‘आजको दुर्घटनाको विषयमा भने छानबिनसमिति नै बन्छ । यो घटना प्राविधिक कारणले भएको हुन सक्छ । त्यसैले छानबिनबाट जे प्रतिवेदन आउँछ त्यसबाट मात्रै घटनाको कारणसहितको जानकारी आउने छ’, नेपाल नागरिक उड्डयन प्राधिकरणका प्रवक्ता जगन्नाथ निरौलाले भने ।

उनका अनुसार पछिल्लो समय देखिएको हेलि दुर्घटनाको कारण प्राविधि हो । प्राविधिक कारणले हुने यस्तो घटना कसैको बसमा नहुने उनको भनाइ छ ।

यो हेलिकप्टर अगाडिको भागबाट जमिनमा खसेको कारण क्याप्टेन पौडेलसहित अर्को एक जनाको टाउकोमा गम्भीर चोट लागेको छ । यो हेलिकप्टर दुर्घटना बढी गम्भीर खालको भएको प्राधिकरणकै अधिकारीले बताएका छन । 

३९ वटा हेलिकप्टर दुर्घटना, भवितव्य र लापरवाही दुवै कारण

शुक्रवारसहित नेपालमा हालसम्म ३९ वटा हेलिकप्टर दुर्घटना भएका छन् । नेपाल नागरिक उड्डयन प्राधिकरणको तथ्याङ्कअनुसार हालसम्म विभिन्न कम्पनीका हेलिकप्टर विभिन्न ठाउँमा गरी ३९ पटक दुर्घटना भएका छन् ।

यी ३९ वटा दुर्घटनामध्ये अधिकांश भवितव्य र केही लापरबाहीका कारण भएको पाइएको छ । ३ अगस्ट २०१४ मा सिन्धुपाल्चोकमा भएको फिस्टेल एयरको हेलिकप्टर दुर्घटना लापरबाहीकै कारण भएको हवाई क्षेत्रका एक जानकारले बताए । त्यो दुर्घटनामा हेलिकप्टरको पंखाले लागेर एक जनाको ज्यान गएको थियो ।

रोकिराखेको हेलिकप्टर उडाउन लाग्दा भएको यस्तो दुर्घटना सावधानी नअपनाउँदा भएको प्रतिवेदनमा उल्लेख छ ।

३० जुन २०१८ मा ग्राण्डीले अस्पतालको कौशीमा भएको सिम्रिक एयरको दुर्घटना पनि असावधानीकै कारण भएको पाइएको छ । त्यो दुर्घटनामा अवतरण गर्ने क्रममा हेलिकप्टर माथिल्लो तलबाट तल्लो तलामा झरेको थियो ।
यस अघि २५ चैत २०७९ मा ह्याम्स हेलिकप्टरको कौशीमा अवतरणका क्रममा भएको हेलिकप्टर दुर्घटना पनि पाइलटको असावधानीकै कारण भएको पाइएको छ । पाइलटको असावधानीका कारण हेलिकप्टरको पुच्छरले छुँदा दुर्घटना हुन पुग्यो । दुर्घटना सामान्य भए पनि अहिलेसम्म उक्त हेलिकप्टर मर्मत भएर उडान शुरु गर्न सकेको छैन ।

यस्तो छ एक महिना अगाडिको हेलिकप्टर दुर्घटनाको तथ्यांक

​