नक्कली भुटानी शरणार्थी प्रकरणमा कांग्रेसले भन्यो : जो–जो सहभागी छन् सबै कानूनी दायरामा आउनुपर्छ

नेपाली कांग्रेसले नक्कली भुटानी शरणार्थी खडा गरी अमेरिका लाने ठगीमा सहभागी जोसुकै पनि कानूनी दायरामा आउनुपर्ने बताएको छ । 

पदाधिकारी बैठकपछि प्रवक्ता डा. प्रकाशशरण महतले नक्कली शरणार्थी खडा गरी अमेरिका लान खोज्नु जघन्य अपराध भएको भन्दै संलग्न जो भए पनि कानूनी दायरामा आउनुपर्ने बताएका हुन् ।

 ‘यो शरणार्थी प्रकरणको विषय पत्रपत्रिकामा आएपछि जानकारी पायौं । यस्तो क्रियाकलापलाई कुनै हालतमा मान्दैनौं । यो अपराधिक काम हो । जति निन्दा गरे पनि कम हुन्छ’ महतले भने, ‘यसमा को–को संलग्न छन् ।

अनुसन्धानले बाहिर ल्याउला । न्याय निरुपण होला । जो जो सहभागी छन् कानूनी दायरामा आउनुपर्छ । राज्य संयन्त्रले सबैलाई पनि संरक्षण गर्न सक्दैन । यो कल्पना पनि गर्ने विषय होइन । जसले गलत काम गरेको छ । पर्दाफास हुनुपर्छ । कानूनी कठघरामा आउनुपर्छ ।’