प्रमुख तीन दलका शीर्ष नेताको बैठकमा नक्कली ​भुटानी शरणार्थी प्रकरणले प्रवेश पाएको छ । आइतवार बालुवाटारमा बसेको प्रमुख दल नेपाली कांग्रेस, नेकपा एमाले र माओवादी केन्द्रका शीर्ष तीन नेताको छलफलमा यसबारे चर्चा भएको एमाले संसदीय दलका उपनेता सुवासचन्द्र नेम्वाङले जानकारी दिए । 

शीर्ष नेताहरूको बैठकमा नक्कली शरणार्थी प्रकरणबारे अनौपचारिक छलफल भएको उनले बताए । उनका अनुसार शीर्ष तीन नेताले शरणार्थी प्रकरणमा चलिरहेको अनुसन्धानलाई सघाउने सहमति रहेको बताएका हुन् । 

नेताहरूले संविधान र कानूनअनुसार काम कारवाही अघि बढाउन कुनै हस्तक्षेप गर्न नहुने बताएको उनले जानकारी दिए । ‘प्रसंगवश विषय उठेको थियो । तपाईहरू तीन नेता बस्नेवित्तिकै शरणार्थीबारे छलफल गर्न बस्यो भनेर चर्चा हुन्छ, के हो ? भनेर हाँस्दै सोध्ने मान्छे मै हो ?,' नेताहरूले दिएको जवाफ उदृत गर्दै नेम्वाङले भने, 'हामी तीन दलबीच एउटा समझदारी छ । संविधान र कानून बमोजिम निष्कर्षमा पुगोस् भन्ने हाम्रो चाहना हो, त्यही कुरा भनिदिए हुन्छ।’

पछिल्लो समय माओवादी केन्द्रका अध्यक्षसमेत रहेका प्रधानमन्त्री प्रचण्ड,  नेपाली कांग्रेसका सभापति शेरबहादुर देउवा र एमाले अध्यक्ष केपी शर्मा ओलीबीच लगातार भेटवार्ता भइरहेका छन् । आइतवारको बैठकमा भने तीनै पार्टीका संसदीय दलका उपनेता र प्रमुख सचेतकसमेत थिए।

छलफलमा संसदीय समिति भागबण्डामा सहमति भएको छ ।