नेपाली कांग्रेसमा असन्तुष्ट युवाहितका नेताहरूले रुपान्तरणको अभियान घोषणा गरेका छन् । जनताको विश्वास पाएर सत्ताको अवसर पाउँदा पनि कांग्रेसमा अपेक्षित रुपान्तरणको काम गर्न नसकेको भन्दै उनीहरूले अभयिान घोषणा गरेका हुन् ।

युव नेताहरू गुरु घिमिरे, डा. गोविन्दराज पोखरेल, मधु आचार्य, भुपेन्द्रजंग शाही, रञ्जित कर्णसहितका नेताहरूले पहिलो चरणमा सात वटा प्रदेश रुपान्तरणको अभियान अन्तर्गत विभिन्न कार्यक्रमको घोषणा गरेका हुन् । 
‘कांग्रेसको गौरवशाली संघर्ष, त्याग र समर्पण भावको कारण कांग्रेस नेपाली जनताको भरोसा र विश्वास जित्न सफल भएर विगत तीन दशकमा कैयन् पटक सरकारको नेतृत्व गर्न पुग्यो ।​

कांग्रेस नेतृत्वको सरकार संचालनमा नेपाली समाजको रुपान्तरणको अभियानले अपेक्षित सफलता पाउन सकेन । कांग्रेस अलमलियो !’ कार्यक्रमको घोषणा गर्दै उनीहरूले भनेका छन्, ‘कांग्रेसका कमी कमजोरीहरूबाट फाइदा उठाएर देशको राजनीतिमा उग्रवामपन्थी र दक्षिणपन्थी शक्तिहरूको उदय भयो । तसर्थ अब कांग्रेसले आफ्नो इतिहासलाई साक्षी राखेर नयाँ कांग्रेस निर्माण गर्नुपर्छ, कांग्रेस रुपान्तरणको अभियानलाई अगाडि बढाउनु पर्ने टड्कारो अवश्यकता यहि हो ।’

संरचनागत सुधारमा चुस्त संगठन, दुरुस्त सदस्यता, भ्रातृ संस्थाहरूको पुनर्जीवन, क्षमताको परीक्षण र अवसरको समानता, निर्वाचन प्रणालीमा परिवर्तन, सन्तुलित विदेश नीति र भ्रष्टाचार मुक्त राजनीति र सुशासनको विषयलाई अभियानको मुख्य विषय बनाएका छन् ।

त्यस्तै, सेवामुखी राजनीति, उद्यमशील पार्टी सदस्य, राजनीतिमा आत्मनिर्भर, योग्य तन्त्रमा आधारित लोकतन्त्र, आध्यात्मिक चेतसहितको राजनीति र व्यक्ति वा गुटकेन्द्रित राजनीतिको अन्त्य गर्न माग गरेका छन् ।
कार्यक्रम ११ जेठमा मधेश प्रदेशको जनकपुरबाट शुरू हुने जनाइएको छ । सातवटै प्रदेशमा भेला र अन्तक्रिर्यासहितका कार्यक्रम हुनेछन् ।

बृहत् भेला तथा अन्तरक्रिया कार्यक्रमहरू

१. मधेश प्रदेश - २०८० जेठ ११ गते, जनकपुर

२. बागमती प्रदेश - २०८० जेठ १६ गते, काठमाडौं

३. गण्डकी प्रदेश - २०८० जेठ २० गते, पोखरा

४. लुम्बिनी प्रदेश - २०८० जेठ २२ गते, दाङ

५. कर्णाली प्रदेश - २०८० जेठ २४ गते, सुर्खेत

६. सुदूरपश्चिम प्रदेश - २०८० जेठ २६ गते, धनगढी

७. कोशी प्रदेश - २०८० जेठ २९ गते, इटहरी

भेला र अन्तरक्रियाबाट प्राप्त सुझावाका आधारमा आगामी कार्यक्रमहरू तर्जुमा गरिने कांग्रेसले जनाएको छ ।