नेपालीलाई नक्कली भुटानी शरणार्थी बनाएर अमेरिका पठाउने कार्यमा संलग्न गिरोहमाथि एक्सन लिएका उपप्रधान एवम् गृहमन्त्री नारायणकाजी श्रेष्ठलाई बधाई दिन नागरिक अगुवाद्वय डा देवेन्द्रराज पाण्डे र कृष्ण पहाडी गृह मन्त्रालय पुगेका छन् । 

मंगलबार गृह मन्त्रालय पुगेर उनीहरुले खुशीका साथ बधाई र समर्थन व्यक्त गरेको गृहमन्त्रीको सचिवालयले जनाएको छ । 

भेटमा उनीहरुले श्रेष्ठको पछिल्ला कदममा ऐक्यबद्धता जनाएका थिए । साथै उनीहरुले गृहमन्त्रीबाट थप अपेक्षा र विश्वासका साथ  केही नागरिक खबरदारी समेत व्यक्त गरेको बताइएको छ । 

गृहमन्त्रीको सक्रियतामा नक्कली भुटानी शरणार्थी प्रकरणमा पूर्वउपप्रधानमन्त्री टोपबहादुर रायमाझीसहित १४ जना पक्राउ परिसकेका छन् । उनीहरुमाथि अनुसन्धान भइरहेको छ । यस्तै श्रेष्ठ गृह मन्त्रालयमा आएपछि विभिन्न सुधारका कामहरु समेत भइरहेका छन् ।