नेकपा एकीकृत समाजवादीले आज बुधवार ३०औं मदनआश्रित स्मृति दिवस मनाउने भएको छ ।

पार्टी केन्द्रीय कार्यालय आलोकनगरमा दिवसका सन्दर्भमा बुधवार पार्टीका अध्यक्ष माधवकुमार नेपालसहित नेताको उपस्थितिमा श्रद्धाञ्जलीसभा लगायत कार्यक्रम गर्न लागिएको छ ।

मदनआश्रितको योगदानबारे पार्टी निकट संगठनले सबै जिल्लामा श्रद्धाञ्जली सभा, खेलकुद प्रतियोगिता गर्ने उपमहासचिव एवं प्रचार विभाग प्रमुख जगन्नाथ खतिवडाले जानकारी दिए ।

तत्कालीन नेकपा एमालेका महासचिव मदन भण्डारी र संगठन विभाग प्रमुख जीवराज आश्रितको विक्रम संवत् २०५० जेठ ३ गते दासढुंगामा भएको दुर्घटनामा परी निधन भएको थियो । 

यसैबीच पार्टीले नक्कली शरणार्थी प्रकरणमा दोषीलाई कारबाही गर्न माग गर्दै पार्टीले देशभर जिल्ला प्रशासन कार्यालयमार्फत सरकारलाई ध्यानाकर्षण गराएको छ । घटनाको निष्पक्ष छानबिन गरी संगठनिक आपराधिक गतिविधिमा संलग्न सबैलाई कडाभन्दा कडा सजाय दिएर दण्डित गर्न सम्बन्धित प्रमुख जिल्ला अधिकारीलाई ध्यानाकर्षणपत्र बुझाएको हो ।

पार्टीले बुधवार देशभर दबाबमूलक कार्यक्रमस्वरूप प्रदर्शन गर्ने उपमहासचिव खतिवडाले जानकारी दिए ।