कोशी प्रदेश खेलकुद विकास बोर्डका सदस्य सचिव वाग्ले बर्खास्त

कोशी प्रदेश खेलकुद बोर्डका सदस्य सचिव हंशराज वाग्लेलाई प्रदेश सरकारले बर्खास्त गरेको छ ।

बुधवार बसेको मन्त्रिपरिषद् बैठकले वाग्लेलाई हटाउने निर्णय गरेको भौतिक पूर्वाधार विकासमन्त्री दुर्गाप्रसाद चापागाईंले बताए । 

वैशाख १४ गतेदेखि १६ गतेसम्म झापामा आयोजित प्रथम मुख्यमन्त्री कप राष्ट्रिय पुरुष भलिबल प्रतियोगिता आयोजना गर्ने क्रममा ब्यानरमा कोशी प्रदेशको नाम नलेखेको भन्दै वाग्लेलाई सामाजिक विकास मन्त्री बुद्धि कुमारराज भण्डारीले २ पटकसम्म स्पष्टीकरण सोधेका थिए । 

मन्त्रालयले पहिलोपटक वैशाख १७ गते वाग्लेलाई पत्र लेख्दै ७ दिनभित्र चित्त बुझ्दो स्पष्टीकरण पेश गर्न भनेको थियो । वाग्लेले स्पष्टीकरणको चित्त बुझ्दो जवाफ नदिएको भन्दै मन्त्रालयले कारणसहित ३ दिनभित्र स्पष्टीकरण पेश गर्न वैशाख २८ पुनः अर्काे पत्र पठाएको थियो । 

मन्त्रालयले प्रभू बैंकलाई पत्र लेख्दै प्रदेश खेलकुद विकास बोर्डको बैंक खाता रोक्का गर्न भनेको थियो ।  सामाजिक विकास मन्त्रालयसँग समन्वय नगरेको भन्दै मन्त्रिपरिषद् बैठकले उनलाई हटाउने निर्णय गरेको छ ।

वाग्ले नेकपा एकीकृत समाजवादीको कोटाबाट नियुक्त भएका थिए । राजेन्द्र राई मुख्यमन्त्री भएका बेला उनी नियुक्त भएका हुन् ।