छाउनीस्थित वीरेन्द्र अस्पतालमा अत्याधुनिक एमआरआई मशिन जडान भएको छ । 

मशिन जडानबाट नेपाली सेनामा प्रविधिमा आधारित स्वास्थ्य उपचार सुविधाको विस्तारमा ठूलो उपलब्धि हासिल भएको सेनाले जनाएको छ ।

जनवादी गणतन्त्र चीन सरकारबाट नेपाली सेनालाई सहयोग स्वरूप प्राप्त मशिन औपचारिक रूपमा हस्तान्तरणका लागि आयोजित समारोहमा नेपालका लागि चीनका महामहिम राजदूत चेन सङ र प्रधान सेनापति महारथी प्रभुराम शर्माले मशिन जडित कक्षको संयुक्त रूपमा उद्घाटन गरे ।

समारोहलाई सम्बोधन गर्दै प्रधान सेनापति प्रभुराम शर्माले नेपाली सेनाको स्वास्थ्य उपचार क्षेत्रमा पुर्‍याएको योगदानका लागि चीन सरकार तथा चिनियाँ जनमुक्ति सेनाप्रति नेपाली सेनाको तर्फबाट आभार प्रकट गरे । नेपाली जनता तथा चिनियाँ जनताहरूबीच रहँदै आएको युगौं पुरानो सुमधुर सम्बन्धबारे उल्लेख गर्दै प्रधान सेनापतिले सन् २०१५ को विनाशकारी भूकम्प पश्चातको उद्धार तथा पुनर्निर्माण प्रयासहरूका साथै कोभिड–१९ महामारी विरुद्धका प्रयासमा चीनबाट प्राप्त सहयोग नेपाली जनता तथा नेपाली सेनाका लागि स्मरणीय रहने कुरा बताए ।

कार्यक्रममा आफ्नो मन्तव्य राख्दै चिनियाँ राजदूत सङले नेपाल चीनको एक असल छिमेकीका रूपमा रहिआएको बताउँदै नेपाली सेनाको स्वास्थ्य उपचार क्षेत्रको सुधारमा सहयोग गर्न पाएकोमा प्रसन्नता व्यक्त गरे । उनले २ देशका जनता तथा सरकारहरूबीचको सम्बन्ध सुमधुर रहेको तथा भविष्यमा पनि रहिरहने विश्वास समेत व्यक्त गरे ।

वीरेन्द्र अस्पतालमा आयोजित कार्यक्रममा बलाधिकृत रथी, नेपाली सेनाका रथीवृन्द तथा अधिकृतहरू लगायत चिनियाँ राजदूतावासका पदाधिकारी एवं चिनियाँ सैनिक सहचारीको उपस्थिति रहेको थियो ।