नक्कली भुटानी शरणार्थी प्रकरणका मुख्य राजनीतिक बिचौलिया बेचन झा अहिले फरार छन् । भारतीय नागरिक झा पक्राउ परेपछि यस विषयमा थप तथ्य खुल्ने तत्कालीन गृह सचिव टेकनारायण पाण्डेले बयान दिएका छन् ।

नक्कली शरणार्थी प्रकरणमा प्रहरी हिरासतमा रहेका तत्कालीन गृह सचिव पाण्डेले बयानका क्रममा भारतीय नागरिक बेचन झा राजनीतिक बिचौलिया रहेको बताएका छन् ।

जिल्ला सरकारी वकिल कार्यालयमा अनुसन्धान अधिकृतले लिएको बयानमा पाण्डेले झा राजनीतिक रूपमा सम्पर्कमा आएको बताएका छन् ।

‘विगतदेखिको गतिविधि र हाम्रो कार्यकालमा यस विषयमा सम्पर्कमा आएका व्यक्तिहरूको कनेक्सन हेर्दा शरणार्थी समस्यालाई राजनीतिक परियोजनाका रूपमा विकास गरेको देखिन्छ, पाण्डेले बयानमा भनेका छन्,’ राजनीतिक रुपमा सम्पर्कमा आएका बेचन झासँग बयान लिएपछि यस विषयमा थप गहिराइमा पुग्न सकिन्छ’ पाण्डेले थप भनेका छन्, ‘राजनीतिक कनेक्सनको विषय भएकाले आफूले यस विषयलाई सचेतना र सतर्कतापूर्वक लिएर जाहेरीका प्रतिवादी केशवप्रसाद दुलालसँग आवश्यक सूचना प्राप्तिका लागि निकटता कायम गर्न आवश्यक भएकाले बढी कुराकानी भएको देखिएको हो ।’

दुलालले मन्त्रीलाई भेट्ने भनेपछि सचिवालयमार्फत सम्पर्क गर्ने भनेको उनले बयानमा भनेका छन् । ‘मन्त्रीज्यू'लाई भेटघाट गर्न चाहन्छौं भनेपछि मैले सचिवालयमार्फत नै सम्पर्क गर्नु भनेर भनेको हो। फर्किने क्रममा हामीले मन्त्रीज्यू'सँग सम्पर्क गर्यौं भनेका थिए।’ उनले बयानका क्रममा भनेमा छन् ।