‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेका २४ घण्टाका मुख्यमुख्य घटनाक्रमसहित उपस्थित भएका छौँ–
पशुपतिको जलहरी प्रकरणमा प्रधानमन्त्री पुष्पकमल दाहाल ‘प्रचण्ड’ले जवाफ दिएपछि प्रतिनिधिसभाको अवरोध हटेको छ । शनिवार बसेको बैठकको शुरुमै प्रधानमन्त्री प्रचण्डले पशुपतिको जलहरी सम्बन्धमा माआवादीका सांसदले दिएको अभिव्यक्ति संसद्बाट हटाउन सकिने बताएका थिए ।

माओवादी सांसद लेखनाथ दाहालले एमाले अध्यक्ष केपी शर्मा ओली प्रधानमन्त्री रहेको समयमा पशुपतिमा राखिएको जलहरी सुनको नभइ पित्तलको भनेर दिएको अभिव्यक्तिलाई लिएर एमालेले शुक्रवार संसद् अवरोध गरेको थियो ।

संसदको अवरोध हटेसँगै आर्थिक वर्ष २०८०–८१ का लागि नेपाल सरकारको वार्षिक नीति तथा कार्यक्रम प्रतिनिधिसभाबाट बहुमतले पारित भएको छ । नेकपा माओवादी, नेपाली कांग्रेस, जसपा, नेकपा एकीकृत समाजवादी लगायतका दलले नीति तथा कार्यक्रमलाई समर्थन गरे । नीति तथा कार्यक्रम पारित गर्न प्रतिनिधि सभाको बैठक शनिवार राति अबेरसम्म चलेको थियो ।

छलफल सकेर संशोधनलाई निर्णयार्थ पेश गरेपछि सभामुख देवराज घिमिरेले राति साढे ९ बजे नीति तथा कार्यक्रमलाई निर्णयार्थ पेश गरेका थिए ।  विपक्षी दलले मतविभाजन नमागेका कारण ध्वनी मतबाटै सरकारका नीति तथा कार्यक्रम बहुमतले पारित भयो ।
००००
त्यसअघि प्रधानमन्त्रीले पशुपतिनाथ मन्दिरमा जलहरी राख्ने काम पशुपति क्षेत्र विकास कोषको भएकाले यो विषयमा प्रमुख प्रतिपक्षी दललाई जोड्नु उचित नहुने बताए ।
‘पशुपतिनाथमा जलहरीबारे चर्चा उठेको छ । पशुपतिमा जलहरीको काम गर्ने क्षेत्राधिकार पशुपति क्षेत्र विकासका कोषको हो । यसमा विवाद छैन । अख्तियारमा निवेदन परी छानबिन भइरहेको छ । आयोगले स्वतन्त्र छानबिन गर्नेछ । यसमा सरकारको सहयोग रहनेछ’ प्रधानमन्त्रीले भने, ‘जलहरी सम्बन्धमा प्रमुख प्रतिपक्षी दलका नेतालाई जोडिनु उचित होइन । यस्ता विषय संसद बाट हटाउने प्रचलन रहेको छ ।’

प्रचण्डको जवाफपछि सभामुख देवराज घिमिरेले पशुपतिनाथको जलहरीमा भ्रष्टाचार भएको अभिव्यक्ति संसद्को रेकर्डबाट हटाउन निर्देशन दिए । 
००००
यसैबीच सांसद लेखनाथ दाहालले भने भ्रष्टाचार विरुद्धको आफ्नो आवाजलाई दबाउन खोजिएको बताएका छन् ।

पशुपतिनाथको सुनको जलहरीमा पित्तल मिसाएर भ्रष्टाचार गरेको उनको अभिव्यक्ति संसद्को रेकर्डबाट हटाउने निर्णयप्रति सांसद दाहालले असन्तुष्टि जनाएका हुन् । यसअघि शनिबार बिहान बसेको प्रधानमन्त्रीसहित माओवादी केन्द्र, कांग्रेस र एमालेको बैठकले सांसदको अभिव्यक्ति रेकर्डबाट हटाउने सहमति गरेको थियो । 
यससँगै जलहरी प्रकरण राजनीतिक तहबाट थामथुम पारिएको छ । 
००००
प्रधानमन्त्री पुष्पकमल दाहाल प्रचण्डले केही समयभित्र भ्रष्टाचारविरुद्ध ठूल्ठूला एक्सन हुन लागेको बताएका छन् । प्रेस सेन्टर नेपालको १९औं साधारण सभा एवम् २१औं कृष्णसेन इच्छुक स्मृति दिवसका अवसरमा शनिवार काठमाडौँमा आयोजित समारोहलाई सम्बोधन गर्दै उनले जनयुद्धमा जस्तै अहिले भ्रष्टाचार र वेथितिविरुद्ध हाम फालेको बताए ।
००००
नेपाली कांग्रेसका सभापति शेरबहादुर देउवाले पार्टीको आलोचना गर्न आग्रह गरेका छन् । नेपाल प्रेस युनियनको ३२औं स्थापना दिवसको समारोहलाई काठमाडौंमा सम्बोधन गर्दै देउवाले लोकतन्त्रमा गरिने स्वस्थ आलोचनाले पार्टी झन् बलियो हुने बताएका हुन् ।
००००
भारतको विदेश मन्त्रालयले प्रधानमन्त्री पुष्पकमल दाहाल प्रचण्डको भारत भ्रमणको तालिका सार्वजनिक गरेको छ । भारतीय प्रधानमन्त्री नरेन्द्र मोदीको निमन्त्रणामा प्रचण्डले मे ३१ (अर्थात् जेठ १७ गते) मा भारत भ्रमण गर्ने मन्त्रालयले जनाएको छ ।
००००
नेपाली कांग्रेसका महामन्त्री विश्वप्रकाश शर्माले नक्कली शरणार्थी प्रकरणमा नेकपा एमालेका अध्यक्ष केपी शर्मा ओलीले संसदमा दिएको अभिव्यक्तिप्रति आपत्ति जनाएका छन् ।
प्रहरीले अनुसन्धान गरिरहेको विषयमा संसदको रोष्टमबाट कसैले न्यायाधीशले जस्तो फैसला सुनाउन नमिल्ने उनको भनाइ थियो ।
००००
अमेरिकी सरकारले धर्म र धर्मान्तरणका  बारेमा हालै निकालेको रिपोर्टबारे चासो राख्दै सरकारले अमेरिकालाई एक नोट पठाएको छ । प्रधानमन्त्री प्रचण्डले शनिबार संसदमा बोल्दै नेपालस्थित अमेरिकी दूतावासमार्फत अमेरिकी सरकारलाई नोट पठाइएको जानकारी दिएका हुन् ।

यस्तै प्रचण्डले नागरिकता विधेयक प्रमाणीकरणका लागि अनुरोध गर्दै राष्ट्रपति कार्यालयमा पत्राचार भइसकेको पनि बताए । 
तर, नागरिक अगुवाहरुले नागरिकता विधेयक प्रमाणीकरण नगर्न राष्ट्रपति रामचन्द्र पौडेलमाथि दवाव बढाएका छन् । नागरिक अगुवाहरु  साध्यबहादुर, भण्डारी, डा सुरेन्द्र भण्डारी, रामकुमार रिजाल, सुवोधराज प्याकुरेल, अनियोल योगी, स्वागत नेपालसहितका ६१ जनाले यसअघि प्रमाणीकरण नभएको विधेयकलाई पुनः मन्त्रिपरिषद्ले पठाउने कानुनी व्यवस्था नभएको जिकिर गरेका छन् ।