कोशीमा सरकारदेखि संसदसम्म एमाले एक्लियो, प्रदेशसभा बैठकमा कांग्रेस–माओवादीसँग जुहारी

प्रतिनिधिसभा बैठकमा जस्तै कोशी प्रदेशसभा बैठकमा पनि मंगलवार सांसदहरूबीच जुहारी चलेको छ । 

प्रतिनिधिसभा बैठकमा नागरिकता विधेयक प्रमाणीकरण र मुर्रा राँगाको विषयलाई लिएर दोहोरी चलेको थियो । कोशी प्रदेशसभा बैठकमा पनि त्यहीँ विषयलाई लिएर जुहारी चलेको छ ।

लोकदोहोरीमा कलाकारले गीतका टुक्का भने जस्तै प्रदेश सांसदले पनि लोकदोहरी जस्तै बनाएका थिए प्रदेशसभा बैठक ।

प्रदेशसभा बैठकमा नेकपा माओवादी केन्द्र संसदीय दलको तर्फबाट विशेष समय लिएर बोलेका गणेश उप्रेतीले नेकपा एमालेले नागरिकता ऐनको विषयमा सरकारको विरोध गरेर मधेशी जनताको भावनामा खेलवाड गरेको बताए । एमालेप्रति लक्षित गर्दै मधेशी अनुहार हुनेवित्तिकै राष्ट्रघाती देख्ने कस्तो नश्लीय चिन्तन भन्दै उप्रेतीले प्रश्न उठाएका थिए ।

प्रधानमन्त्री पुष्पकमल दाहाल ‘प्रचण्ड’ले भारत भ्रमणबाट फर्किंदा भैंसी उपहार ल्याएको भनेर व्यंग्य गरेको विषयमा पनि उनले खेद व्यक्त गरे । 

‘महाकाली सन्धि गर्दा वार्षिक १२० अर्बको बिजुली बेच्छौं भन्ने जस्तो अहिलेको हावादारी सम्झौताहरू भएका छैनन् । नेपालको विद्युत् तेस्रो मुलुकमा पुग्ने भएको छ । यो राष्ट्रघात हो ? धेरै उपलब्धि भए पनि राँगा मात्रै देख्ने तपाईंको मानसिकता कालो मानसिकता हो,’ उनले भने ।

‘मुर्रा राँगा ल्याउने मात्रै सहमति भएको हो ? तत्कालीन प्रधानमन्त्री केपी शर्मा ओलीले राँगा ल्याउने पहुँच पनि राख्न सक्नुभएन । उहाँले त राँगा ल्याउने पहुँच पनि राख्नुभएन । अहिले प्रचण्डले ल्याउँदा किन टाउको दुखाएको ? के नदी बेचेर आउनुपर्ने ? पहाड बेचेर आउनुपर्ने ? नश्ल सुधारका लागि राम्रो कुरा लिएर आउँदा प्रशंसा गर्नुपर्नेमा किन खिसिट्यूरी ?’ उनले प्रश्न गरे ।

उप्रेती बोलेको विषयलाई लिएर एमालेले नियमापत्ति गरेको थियो । एमालेका प्रमुख सचेतक रेवतीरमण भण्डारीले नियमापत्ति गरे । उप्रेति बोल्दै गर्दा भण्डारीले बीचमै नियमापत्ति गरेका थिए तर सभामुखले उप्रेती बोलिसकेपछि मात्रै भण्डारीलाई बोल्न समय दिएका थिए । 

नागरिकता ऐन कार्यान्वयनको विषयमा सर्वोच्च अदालतमा मुद्दा विचाराधीन रहेको र सर्वोच्च अदालतमा भएका विचाराधीन विषयमा संसदमा बोल्न नपाउने जिकिर गर्दै भण्डारीले नियमापत्ति गरेका थिए । भण्डारीले संघीय संसदभित्र के भयो भन्ने कुरा त्यहीँ संसदको विषय भएको बताउँदै प्रदेश सभामा त्यहाँको बहसको विषयमा उठाउन नहुने बताउँदै संविधानमा भएको व्यवस्था विरुद्धको विषय रेकर्डबाट हटाउन माग गरे ।

भण्डारीको कुरा खण्डन गर्दै नेपाली कांग्रेसका सांसद केदार कार्कीले नागरिकताको विषय अदालतको विषय मात्रै नभई जनताको विषय भएको भन्दै बोल्न पाउनुपर्ने दाबी गरे । कार्कीले एमाले अध्यक्ष ओलीप्रति लक्षित गर्दै भने, ‘माननीयज्यूलाई थाहा हुनुपर्छ । उहाँका नेता जनताको आन्दोलनका लागि कृषकको टाउको काटेर आउनुभएको हो । त्यस्ता नेता र पार्टीका सांसदले प्रदेशसभामा के बोल्ने, के नबोल्ने भन्ने विषय सिकाउने ? संसारको जुनसुकै ठाउँमा भएको कुरा पनि जनतालाई अहित हुन्छ भने संसदमा उठ्छ, उठाउनुपर्छ । अघिल्ला सांसदहरूको रेकर्ड हेरेर आउनुहोस् । जुनसुकै कुरामा पनि उभिएर नियमापत्ति गर्नु आवश्यक छैन ।’

त्यसलगत्तै एमाले सांसद विदुरकुमार लिङ्थेपले आफ्ना नेतालाई लक्षित गरी कृषकको टाउको काटेर आएको नेता भनेको विषयमा आपत्ति प्रकट गरे । ‘हाम्रो नेतालाई टाउको काटेर आएको भन्ने ? उहाँको नेता प्लेन अपहरण गरेर, पैसा लुटेर आएको कार्यकर्ता उहाँ माननीयज्यू हुनुहुन्छ । हाम्रो कुन नेताले टाउको काट्यो भन्ने प्रमाण छ ? यो रेकर्डबाट हटाउनुपर्छ,’ लिङ्थेपले भने ।

सभामुख बाबुराम गौतमले कुनै पनि विषय रेकर्डबाट हटाएको घोषणा गरेनन् । एमाले नेतृत्वको सरकारबाट बाहिरिएकै दिन संसदमा काग्रेस–माओवादीको लगनगाँठो कसिएको छ ।