सूर्य नेपाल प्रालिले नेपाली सेनाको नेतृत्वमा सम्पन्न ‘सफा हिमाल अभियान’मा संलग्न नेपाली सेनाका सदस्य तथा शेर्पालाई सम्मान गरेको छ ।

गत चैतमा शुरु भई यही महिना सम्पन्न भएको अभियान अन्तर्गत सगरमाथा, ल्होत्से, अन्नपूर्ण र बरुञ्चे हिमालको सफाइ गरिएको थियो । विभिन्न हिमालहरूबाट ३५ टन फोहोर संकलन गरिएको अभियानको मुख्य साझेदार सूर्य नेपाल पनि हो ।

बिहीवार एक कार्यक्रमका बीच सूर्य नेपालले सफा हिमाल अभियानमा प्रत्यक्ष योगदान पुर्‍याउने ५२ जनालाई विशेष सम्मान गरेको हो ।

कार्यक्रममा सूय नेपालले सफा हिमाल अभियानमा संलग्न हुँदा दिवंगत भएका दुई जना शेर्पा सहयोगीहरूका परिवारलाई एक–एक लाख रुपैयाँ नगद राशिसहित सम्मान गरेको छ ।

कार्यक्रममा सफा हिमाल अभियानमा निधन भएका २ शेर्पा सहयोगीहरू प्रति श्रद्धाञ्जली अर्पण गरिएको थियो भने अभियानको क्रममा घाइते भई उपचाररत नेपाली सेनाका ४ जना अधिकृत र जवानहरूको शीघ्र स्वास्थ्य लाभको कामना गरिएको थियो । 

सम्मान कार्यक्रमको प्रमुख अतिथि रहेका नेपाली सेनाका बलाधिकृत रथी सरोजप्रताप राणाले सफा हिमाल अभियानमा निजी क्षेत्रबाट एउटा मुख्य योगदानकर्ताको रुपमा सहयोग पुर्‍याएकोमा सूर्य नेपाल प्रालिलाई धन्यवाद दिएका थिए ।

कार्यक्रममा सूर्य नेपाल प्रालिका प्रवन्ध निर्देशक रविकुमार रायावारमले नेपालको पहिचानका रुपमा रहेको सर्वोच्च शिखर सगरमाथा लगायतका हिमालहरू सफा गर्ने जस्तो महत्वपूर्ण कार्यक्रममा कम्पनीको व्यावसायिक तथा सामाजिक उत्तरदायित्त्व अन्तर्गत नेपाली सेनासँग सहकार्य गर्न पाएकोमा खुशी व्यक्त गरे ।

त्यसैगरी कार्यक्रममा सूर्य नेपाल प्रालिका भाइस प्रेसिडेन्ट रवि केसीले सूर्य नेपालले आफ्नो व्यावसायिक सामाजिक उत्तर दायित्व निर्वाह गर्ने कार्यलाई अत्यन्तै महत्वका साथ लिएको बताए । साथै सफा हिमाल अभियानमा गरिएको सहयोग पनि त्यसैको निरन्तरता भएको उनको भनाइ थियो ।