मेडिकल व्यवसायी दुर्गाप्रसाद प्रसाईंलाई हत्या गर्ने धम्की दिई ३० करोड रुपैयाँ फिरौती माग गरेको अभियोगमा खोटाङको राहबेशी गाउँपालिका–१ राहबेशी घर भई काठमाडौं महानगरपालिका–४ चुनदेवी बस्ने ४० वर्षीय रमेशकुमार गुरूङलाई प्रहरीले पक्राउ गरेको छ । 

प्रवेश लामाको नामबाट फोन गरी हत्या गर्नका लागि योजना बनिसकेको र सुरक्षित हुन चाहने भए रकम दिनुपर्ने भन्दै मेडिकल व्यवसायी प्रसाईलाई असार १३ गतेदेखि पटक–पटक एसएमएस समेत गरी रकम माग गरेकोमा केन्द्रीय अनुसन्धान ब्यूरो महाराजगञ्जबाट खटिएको प्रहरीले उनलाई काठमाडौंको महाराजगञ्जबाट फिरौती रकम लिन आएको अवस्थामा पक्राउ गरेको हो । 

उनलाई अपहरण तथा शरीर बन्धक उद्योग मुद्दामा थप अनुसन्धान एवं कारवाहीका लागि प्रहरी वृत्त महाराजगञ्ज पठाइएको छ ।