बुधवार साँझ राजस्व अनुसन्धान विभागले त्रिभुवन अन्तर्राष्ट्रिय विमानस्थल भन्सार कार्यालयको जाँचपास क्षेत्र पार गरिसकेको झण्डै एक क्वीन्टल सुन बरामद गरेको थियो । राजस्व अनुसन्धान विभागले मोटरसाइकल र स्कुटरको ‘ब्रेक शु’भित्र लुकाएर ल्याएको सुन बरामद गरेको हो । सुनको यकिन तौल आउन बाँकी छ । राष्ट्र बैंकमा जोखिएपछि सुनको आधिकारिक परिमाण थाहा हुने छ ।

मोटरसाइकल र स्कुटरको ‘ब्रेक शु’आयात गर्ने कम्पनी हो 'रेडी ट्रेड प्रालि' । रेडी ट्रेडले तीन महिनाको अवधिमा ३४ पटक सामान आयात गरेको पाइएको छ ।

दिलिप भुजेल सञ्चालक रहेको कम्पनीले त्रिभुवन अन्तर्राष्ट्रिय विमानस्थलबाट सन् २०२३ अप्रिल २४ तारिखबाट १८ (मंगलवार) जुलाईसम्म तीन महिनाको अवधिमा जम्मा ३४ पटक समान आयात गरेको पाइएको हो ।

सिनामंगलस्थित त्रिभुवन अन्तराष्ट्रिय विमानस्थलको कार्गो गोदाम व्यवस्थापन गरिरहेको नेपाल पारवहन तथा गोदाम व्यवस्था कम्पनी लिमिटेडकी इन्चार्ज सुनिता सिंहले लोकान्तरलाई दिएको जानकारी अनुसार कम्पनीले 'कन्सोल शिपमेन्ट'को नाममा हालसम्म ३४ पटक सामान गोदाममा भण्डारणगरी भन्सार जाँच पास गराई लगेको हो ।

सिंहका अनुसार कम्पनीले अप्रिल २४, अप्रिल ३०, मे २, मे ७, मे १०, मे १४, मे १८, मे २१, मे २४(२ पटक), मे २६, मे २८, मे ३१ (२ पटक) मा सामान आयात गरेको पाइएको छ ।

त्यसैगरी जुन ६ मा २ पटक, जुन ७ मा २ पटक, जुन १२ मा २ पटक, जुन १४, जुन १६, जुन १९, जुन २६, जुन २८ मा सामान गोदाममा राखेर भन्सार जाँच पास गराई लगेको हो ।

त्यसैगरी जुलाई ३, जुलाई ६, जुलाई ९ मा २ पटक, जुलाई १२, जुलाई १४ मा र जुलाई १८ मा २ पटक सामान ल्याएको पाइएको छ ।

'के के सामान ल्याएका थिए भन्ने कुरा सबै अहिले डिटेल हेर्न बाँकी नै छ,' गोदामकी इन्चार्ज सिंहले लोकान्तरसँग भनिन्,'खास गरी स्पेयर पार्ट्सहरू नै आयात गरेको देखिएको छ । कन्सोल शिपमेन्टको नाममा आयात गरेको हो ।' 

ब्रेक शुका नाममा सुन भित्र्याउने रेडी ट्रेड प्रालि आन्तरिक राजस्व कार्यालय महाराजगञ्जमा २०७९ चैत २१ गते मात्र दर्ता भएको पाइएको छ ।

तीन महिनाअघि प्यानमा मात्र दर्ता भएको उक्त कम्पनीको ठेगाना भने बूढानीलकण्ठ नगरपालिकाको पासिकोट रहेको आन्तरिक राजस्व कार्यालयको अभिलेखमा उल्लेख छ । कम्पनीको प्यान नम्बर ६१०४७७९७३ उल्लेख गरिएको छ ।

तस्करी गरी भित्र्याइएको करीब सय किलो (आधिकारिक तौल लिन बाँकी) सुन त्रिभुवन अन्तर्राष्ट्रिय विमानस्थलस्थित गोदाममा पाँच दिनसम्म होल्ड गरेर राखिएको खुलेको छ । सबै सेटिङ मिलेपछि ६३ हजार रुपैयाँ भन्सार बुझाएर जाँचपास गराई लगिरहेको अवस्थामा बुधवार सुन बरामद गरिएको हो ।