राजस्व अनुसन्धान विभागको टोलीले बुधवार काठमाडौंको सोह्रखुट्टेस्थित रेडी ट्रेडको गोदामबाट बरामद गरेको ६६ कार्टुनमध्ये धेरै कार्टुन खोलिएको अवस्थामा फेला परेका छन् । 

विभागले सुन लुकाएको आशंकामा गोदाममा छापा मारेर ती कार्टुन बरामद गरेको थियो । ती कार्टुनहरू साउन ३ गते सिनामंगलबाट ‘ब्रेक शु’भित्र लुकाएर ल्याएको सुनको कार्टुनको आकारका कार्टुनहरू थिए ।

‘हेर्दा धेरै कार्टुनहरू खोलिएको फेला परेको छ, यद्यपि अन्य विषयमा भने अनुसन्धान टोलीले अनुसन्धान गरिरहेको छ,’ विभागका सूचना अधिकारी नवराज अधिकारीले भने ।

साउन ३ गते त्रिभुवन अन्तर्राष्ट्रिय विमानस्थलको भन्सार कार्यालय अगाडिबाट बरामद गरिएको झण्डै सय किलो सुन त्यही रेडी ट्रेड प्रालिको नाममा आएको थियो ।

विभागले अन्य शंकास्पद क्षेत्रमा पनि छापा मार्ने र संलग्नको आशंका गरिएका व्यक्तिको खोजी गरिरहेको जनाइएको छ । विभागले सुन प्रकरणमा १७ जनालाई पक्राउ गरेर अनुसन्धान गरिरहेको छ । बरामद गरिएको सुन भने राष्ट्र बैंकको टक्सार महाशाखामा राखिएको छ ।