राष्ट्रिय स्वतन्त्र पार्टी (रास्वपा) का सांसदहरूले पटक–पटक संसद् अवरोध भएको भन्दै असन्तुष्टि व्यक्त गरेका छन् ।

पछिल्लो समय प्रतिनिधिसभा बैठक अवरोध हुँदा जनताका मुद्दाप्रति शीर्ष नेताहरू जिम्मेवार नदेखिएको उनीहरूको आरोप छ । 

सोमवार पनि बैठक बस्न नसकेपछि रास्वपाका सांसदहरूले संसद् दलीय भागबन्डाको बन्धक भएको आरोप समेत लगाए । पार्टी सभापति एवं रास्वपाका संसदीय दलका नेता रवि लामिछानेले सदन गतिरोधप्रति सामाजिक सञ्जालमार्फत असन्तुष्टि पोखेका छन् ।

‘कैयौ कानून बनाउनुपर्नेछ, कैयौ कानूनमा संशोधन गर्नुपर्नेछ । जनसरोकारका कैयौ मुद्दामा छलफल र निर्णय गर्नुछ तर संसद् चल्दैन, बार्गेनिङ चल्छ,’ उनले सामाजिक सञ्जाल फेसबूकमा भनेका छन् ।

रास्वपाको संसदीय दलका प्रमुख सचेतक सन्तोष परियारले मुख्य ३ दलका कारण संसद् अवरुद्ध हुँदै आएको भन्दै आपत्ति जनाए । ‘संसद्मा महत्त्वपूर्ण विधेयकमाथिको छलफल हुन सकेको छैन, जनताको मुद्दामाथि बहस भइरहेको छैन,’ उनले भने, ‘सत्तापक्ष र प्रतिपक्षका नाममा ३ पार्टीले सदनलाई बन्धक बनाउने कामको रास्वपाले विरोध गर्छ ।’

रास्वपाका उपसभापति एवं सांसद डोलप्रसाद अर्यालले जनताको मुद्दामा सत्तापक्ष र प्रतिपक्ष गैरजिम्मेवार भएको भन्दै असन्तुष्टि व्यक्त गरे । ‘संसद् अवरुद्ध गरेर प्रतिपक्ष र सत्तापक्ष आफैं मिल्ने भेट्ने गरिरहनुभएको छ, सामाजिक सञ्जालमा फोटो आउँछन्,’ उनले भने, ‘सदन सञ्चालनको खर्च, सांसदको समय र जनताको मुद्दामा उहाँहरू जिम्मेवार हुनुभएन ।’

सोमवार बैठक बस्न नसकेपछि प्रतिनिधिसभा बैठक भोलि मंगलवार दिउँसो ३ बजेका लागि तय भएको छ । संघीय संसद्को महासचिव डा. भरतराज गौतमले बैठक विशेष कारणले उक्त समयमा बस्न नसकेको बताए । सुन तस्करी प्रकरणको विषयमा अनुसन्धानका लागि उच्चस्तरीय छानबिन समिति बनाउने मागमा अडान लिएको प्रतिपक्ष नेकपा एमाले सदन अवरोध गर्दै आएको छ ।