नेकपा एमालेले औपचारिक कार्यक्रममा धेरैलाई आसनग्रहण नगराउने निर्णय गरेको छ ।

सोमवार बसेको सचिवालय बैठकले धेरैलाई आसनग्रहण नगराउने सम्बन्धमा निर्णय गरेको अध्यक्ष केपी शर्मा ओलीले सामाजिक सञ्जाल फेसबूकमार्फत जानकारी दिएका छन् ।

पूर्व प्रधानमन्त्री समेत रहेका अध्यक्ष ओलीले फेसबूकमा लेखेका छन्, ‘फेसबूक ट्वीटरमा मलाई प्राप्त म्यासेजहरूमा धेरैजना साथीहरूले कार्यक्रमहरूमा धेरैलाई आसनग्रहण गराएर समय बर्बाद गर्नुभएन भन्ने सुझाव दिने गर्नुभएको थियो । हो पनि । तिनै सुझावलाई मध्यनजर गरेर हाम्रो पार्टीले अस्तिको सचिवालय बैठकबाट यस सम्बन्धी निर्णय गरेको छ । यसैगरी अब अनुहारै छोपिने गरी खादा–माला र कोटभन्दा ठूला व्याच लगाउने प्रचलन पनि बन्द गर्नुपर्छ । कार्यक्रमहरूमा औपचारिकताका लागि धेरैलाई आसनग्रहण गराउने र खादा–मालाले पुर्ने भद्दा चलनहरू हटाएर समयलाई काममा लगाउने विषयमा तपाईंहरूका अरु के सुझावहरू छन् ?’