भारतमा आगामी वर्ष लोकसभा चुनाव हुँदैछ । चुनावमा सत्तारुढ दल भारतीय जनता पार्टी (भाजपा) एकातिर र विपक्षी दलहरू सबै अर्काेतिर पार्ने कोसिस भइरहेको छ ।

भारतीय कांग्रेसले प्रधानमन्त्री नरेन्द्र मोदी विरोध नयाँ गठबन्धन ‘इन्डिया’ गठन गरेर चुनावी तयारी थालेको छ । गठबन्धनमा दिल्लीका मुख्यमन्त्री अरविन्द केजरीवालको आम आदमी पार्टी (आप) पनि समावेश छ ।

बुधवार भएको दिल्ली कांग्रेसको बैठकमा दिल्लीका ७ वटै लोकसभा सिटमा पार्टीकै उम्मेदवार बनाउने निर्णयपछि गठबन्धनमा खटपट देखिएको छ । कांग्रेस नेताहरूले दिल्लीका सबै सिटमा आफैं उम्मेदवार बन्ने र अरुसँग गठबन्धन नगर्ने निर्णय सुनाएका भारतीय सञ्चारमाध्यमले जनाएका छन् ।

कांग्रेसको निर्णय सार्वजनिक भएपछि आपले असन्तुष्टि जनाउँदै यसरी गठबन्धनमा रहिरहनुको औचित्य नहुने स्पष्ट पारेको छ । केही वर्षअघि उदाएको आप पार्टीले दिल्ली र पञ्जाबमा कांग्रेसलाई नै विस्थापित गरेर सत्तामा गएकाले कांग्रेसले आपलाई रुचाउँदैन । तैपनि मोदीविरुद्ध बलियो शक्ति बनाउन आपलाई पनि समेटेर लैजानुपर्ने बाध्यता कांग्रेससामु छ ।