निश्चल बस्नेतको निर्देशन रहेको मल्टिस्टारर फिल्म ‘दिमाग खराब’को राजधानीमा प्रिमियर गरिएको छ । 

बिहीवार बेलुका ललितपुरको लबिम मलमा गरिएको प्रिमियरमा उपसभामुख इन्दिरा राना, काठमाडौं महानगरपालिकाका प्रमुख बालेन्द्र शाह, रास्वपा सभापति रवि लामिछाने, सांसद ज्ञानेन्द्र शाही, सोबिता गौतमलगायतले फिल्म हेरे । 

त्यस्तै, कलाकारहरू हरिवंश आचार्य, दीपकराज गिरी, दीपाश्री निरौलादेखि क्रिकेटरहरू पारस खड्का, रोहित पौडेल, सोमपाल कामी, कुशल भुर्तेललगायत प्रिमियरमा सहभागी रहे । 

नेतादेखि कलाकार र खेलाडीहरूले राम्रो फिल्म बनेको भन्दै प्रशंसा गरेका थिए ।

फिल्मको टीमबाट निर्देशक बस्नेतसहित कलाकारहरू स्वस्तिमा खड्का र खगेन्द्र लामिछाने प्रिमियरमा उपस्थित रहे । 

फिल्ममा दयाहाङ राई, अपर्ण थापा, विजय बराल, सुमन कार्कीलगायतको समेत अभिनय छ । 

सामाजिक–राजनीतिक कथामा बनेको फिल्म ‘दिमाग खराब’ शुक्रवारबाट प्रदर्शनमा आएको छ । तिहारको अवसर पारेर फिल्म रिलिज भएको हो । 

आकाश बरालको कथा रहेको फिल्मको निर्माता रौनक विक्रम कंडेल हुन् ।

तस्वीरहरू : सुरज धामी