पश्चिम नवलपरासीको एक निजी विद्यालयका शिक्षकले एक छात्रालाई निर्घात कुटपिट गरेका छन् । सरावल गाउँपालिका वडा नम्बर ७ स्थित बर्दघाट कालिका इंग्लिस स्कूलमा अध्ययनरत ९ वर्षीया बालिकालाई विद्यालयका शिक्षक निरञ्जन यादवले बुधवार कुटपिट गरेका हुन् । 

कक्षा– १ मा अध्ययनरत कञ्चना राजभरलाई यादवले लठ्ठीले पिटेर घाइते बनाएका छन् । बालिकाको शरीरभरी नीलडाम बसेको छ । 

घटनापछि आक्रोशित भएका स्थानीयले विद्यालयमा तालाबन्दी गरेको वडा नम्बर ७ का वडाध्यक्ष हायात खाँ धुनियाँले बताए । 

शिक्षक यादवले पटक–पटक विद्यालयमा बालबालिकालाई कुटपिट गर्दै आएको भन्दै उनलाई विद्यालयबाट तुरुन्त बर्खास्त र कानूनी कारबाही गर्न अभिभावकले माग गरेका छन् । 

‘शिक्षक यादवले मेरी छोरीलाई विद्यालय नआएको भन्दै घरमै आएर कुटपिट गरे । विद्यालय गएपछि पनि उस्तै पिटे,’ कञ्चनाकी आमा गञ्जला राजभरले भनिन् । 

यसैबीच, पीडित पक्षले जिल्ला प्रहरी कार्यालय, नवलपरासीमा उजुरी दिएको प्रहरीले जनाएको छ । जिल्ला प्रहरी कार्यालयका प्रमुख प्रहरी उपरीक्षक काजीकुमार आचार्यले कुटपिट गर्नेविरुद्ध कारबाही प्रक्रिया अगाडि बढाउने बताए । 

बालिकालाई कुटपिट गर्ने शिक्षक भने फरार रहेका छन् । विद्यालयका प्रिन्सिपल जितेन्द्रकुमार यादवले यस विषयमा लोकान्तरले जिज्ञासा राख्दा कुनै प्रतिक्रिया दिन चाहेनन् ।