पटक–पटक सर्दै आएको नेपाली कांग्रेसको महासमिति बैठक फेरि पनि सर्ने भएको छ ।

यसअघि आन्तरिक तयारी नपुगेको तथा जाजरकोट भूकम्पलाई कारण देखाएर बैठक सरेको थियो । अब मध्यपुस (१६ देखि १९ गतेसम्म)मा गर्न कठिन भएको भन्दै बैठक सार्ने तयारीमा कांग्रेस लागेको हो । 

‘यसअघि पनि हामीले आन्तरिक र भूकम्पका कारण महासमिति बैठक सार्‍यौं, तर यसपटक मध्यपुसको जाडोमा बैठक बोलाउँदा समस्या भयो भन्ने कुरा आएको छ । पदाधिकारी बैठकमा नै पनि मधेसका साथीहरूले शीतलहर चल्ने समयमा नगरौं भन्नुभएको थियो,’ कांग्रेस प्रचार विभाग प्रमुख मीन विश्वकर्माले भने, ‘फेरि यही बेला पार्टी राष्ट्रिय सभाको निर्वाचनमा पनि होमिनुपर्ने भएको छ । यसैले महासमिति बैठक फेरि सार्ने भन्ने हल्ला चलेका हुन् ।’

कांग्रेस सभापति शेरबहादुर देउवाले नै यसअघिको पदाधिकारी बैठकमा महासमिति बैठक फागुनमा गर्न सकिने आशय व्यक्त गरेका छन् । त्यसैले अबको बैठक फागुनमा हुन सक्ने जानकारी विश्वकर्माले दिए । 

‘पार्टीको यो बैठक फेरि सर्दैछ भन्ने कुरा आयो तर, पार्टीले औपचारिक घोषणा गरिसकेको छैन । एकदुई दिनमै पदाधिकारी वा कार्यसम्पादन समितिको बैठक बसेर निर्णय लिन्छ होला,’ विश्वकर्माले भने, ‘महासमितिमा प्रस्तुत हुने डकुमेन्ट लेखनको काम पनि द्रुत गतिमा अघि बढे पनि फाइनल भइसकेको छैन । काम बाँकी नै छन् । झण्डै २५ जति जिल्लाका महासमिति सदस्य पनि टुंगिन बाँकी छन् ।’

तर, बैठक फेरि पनि सार्ने विषयमा महामन्त्रीद्वय गगन थापा र विश्वप्रकाश शर्मा सहमत छैनन् । उनीहरूले आफ्नो भागमा परेको सांगठनिक प्रस्ताव र समसामयिक प्रस्ताव लेखनलाई तीव्रताका साथ अगाडि बढाइरहेका छन् । 

महामन्त्रीद्वयले नै १५ औं महाधिवेशन २०८२ भित्रै गर्नेगरी तालिकाबद्ध हिसाबले आ–आफ्नो दस्तावेज लेखिरहेका छन् । तर, तयारी नपुगेको र जाडोयाम भन्दै पार्टी नेतृत्वले बैठक सार्न खोजेको उनीहरूको आरोप छ । 

१४ औं महाधिवेशनमा नेतृत्वमात्रै चयन हुँदा नीतिगत बहस नै भएको थिएन । एउटा पनि राजनीतिक, सांगठनिक, समसामयिक प्रतिवेदन प्रस्तुत नभएपछि कांग्रेसले बीचमा नीति महाधिवेशन गर्ने घोषणा गरेको थियो । तर, यस्तो महाधिवेशन पनि हुन नसक्ने भएपछि यही महासमिति बैठकले नीति महाधिवेशनको पनि काम गर्ने घोषणा कांग्रेसले गरेको छ । महासमिति बैठक पनि पटक–पटक अन्योलमा पर्दै आएको छ । 

पटक–पटक बैठक सार्दा गलत सन्देश जाने भन्दै थापाले समयमै गर्नुपर्नेमा जोड दिएको थापाका सचिवालय सदस्य प्रताप पौडेल बताउँछन् । 

‘फेरि पनि महासमिति बैठक सार्ने विषय आइरहेको हामीले जानकारी पाएका छौं तर महामन्त्री बैठक सार्ने पक्षमा हुनुहुन्न, किनकि बैठकको तयारीका काम धमाधम हुँदैछन् । हल खोजिसकिएको छ । डकुमेन्ट पनि तयार भइरहेको छ,’ उनी भन्छन्, ‘छोटो समयमा बैठक सारिरहने प्रवृत्तिले गलत सन्देश जाने भन्दै महामन्त्रीले तोकिएको समयमा बैठक गर्नुपर्ने बताउँदै आउनुभएको छ ।’

बैठक सरेकोसर्‍यै

यसअघि असोज र कात्तिक अन्तिममा महासमिति बैठक गर्ने तयारीमा कांग्रेस थियो, तर हुन सकेन । भदौ ६ मा बसेको केन्द्रीय समितिको बैठकले महासमिति मंसिर १३ देखि १५ सम्म काठमाडौंमा गर्ने निर्णय गर्‍यो ।

तर, कात्तिक १७ गते बसेको कार्यसम्पादन समितिको बैठकले जाजरकोट भूकम्प, महासमिति सदस्य टुंगिन बाँकी रहेको जस्ता कारण देखाउँदै महासमिति मंसिर २९ देखि पुस २ गतेसम्म गर्ने निर्णय गर्‍यो । तर, कात्तिक २१ गते पत्रकार सम्मेलन गरी कांग्रेसले पुस १६ देखि १९ गतेसम्म महासमिति बैठक गर्ने निर्णय भएको जानकारी गरायो ।

यसअघि कांग्रेस केन्द्रीय समितिले प्रत्येक दुई महिनामा केन्द्रीय समितिको बैठक गर्ने निर्णय गरेको थियो । एकपटक तोकिएकै समयमा यस्तो बैठक बस्यो । अहिले आएर केन्द्रीय समिति बैठकको कार्यतालिका पनि मिचिइसकेको छ ।