नेकपा एमालेले १४ मंसिरदेखि १ पुससम्म मध्यपहाडका जिल्लामा गरेको ‘समृद्धिका लागि संकल्प यात्रा’को निष्कर्ष आगामी आइतवार मात्रै सार्वजनिक गर्ने भएको छ ।

यस अघि अभियानको निष्कर्ष जानकारी गराउन बिहीवार पत्रकार सम्मेलन गर्ने बताइएको थियो । तर ‘झुलाघाटदेखि चिवाभञ्ज्याङसम्म समृद्धिका लागि सङ्कल्प यात्रा’को अभियान सफल भएको जनाएको एमालेले ८ गते पत्रकार सम्मेलन गर्न लागेको पार्टी कार्यालय स्रोतले जानकारी दियो । 

‘सचिवालयको बैठकले यो अभियान सफल भएको निष्कर्ष निकालेको हो । यस अघि ५ पुसमा पत्रकार सम्मेलन गर्ने भनिएकामा अब यसबारेको सम्पूर्ण जानकारी ८ गते दिने भएका छौं’ एमाले कार्यालयका एक कर्मचारीले भने । 

एमालेले पुराना दलप्रति जनताको विश्वास नटुटेको, एमालेको प्रभाव तल्लो तहसम्म राम्रो रहेको, नागरिकका समस्या पहिचान भएको, कार्यकर्ता र जनतासँग नेतृत्व नजिकबाट जोडिएका जस्ता विषयलाई उपलब्धि मानेको छ । 

अध्यक्ष केपी शर्मा ओलीसहितका शीर्ष नेताको उपस्थितिमा पत्रकार सम्मेलन गरेर कार्यक्रम भव्य र सफल भएको जानकारी दिने एमालेको तयारी छ । 

केही समयमै अभियानका क्रममा प्राप्त गरेका विषयलाई समेटेर प्रतिवेदन तयार गर्ने र दस्तावेजका रुपमा सार्वजनिक गर्ने एमालेको तयारी छ ।