काठमाडौं महानगरपालिकापछि काठमाडौंकै अर्को नगरपालिकाले पनि चाडबाडका नाममा पोसाक नकिनाउन विद्यालयलाई निर्देशन दिएको छ ।

काठमाडौंको उत्तरी क्षेत्रमा पर्ने बूढानीलकण्ठ नगरपालिकाले शुक्रवार एक सूचना जारी गर्दै यस्तो निर्देशन दिएको हो ।

बूढानीलकण्ठभित्र सञ्चालित केही विद्यालयले विभिन्न चाडपर्वका नाममा विद्यार्थीलाई फरक पोसाक किन्न लगाइएको भन्ने गुनासोका आधारमा यस्तो नियम ल्याइएको नगर प्रमुख (मेयर) मिठाराम अधिकारीले बताएका छन् ।

‘बूढानीलकण्ठ नगरपालिकाभित्र सञ्चालित केही विद्यालयले विभिन्न चाडपर्वका नाममा विद्यार्थीलाई नियमित विद्यालय पोसाकभन्दा फरक पोसाक किन्न लगाइएको भन्ने गुनासो यस नगरपालिकामा प्राप्त भएकाले तोकिएको विद्यालय पोसाकबाहेक अन्य पोसाक किन्न विद्यार्थीलाई बाध्य नगर्न सबै विद्यालयलाई अनुरोध गरिन्छ,’ प्रमुख अधिकारीले जारी गरेको सूचनामा भनिएको छ, ‘कोही कसैले यस परिपत्रविपरीत कार्य गरेको पाइएमा प्रचलित कानूनबमोजिम भई जाने व्यहोरासमेत जानकारीका लागि अनुरोध छ ।’

यसअघि काठमाडौं महानगरले पनि क्रिसमसका नाममा विद्यार्थीहरूलाई त्यससम्बन्धी कपडा खरिदका लागि बाध्य नपार्न विद्यालयहरूलाई अनुरोध गरेको थियो ।

नजिकिँदो क्रिसमसका अवसरमा विद्यालयहरूले त्यससम्बन्धी पोशाक खरिदका लागि अभिभावकलाई बाध्य पारेको गुनासो आएपछि महानगरले क्रिसमसबारे नाम उल्लेख कारबाहीको चेतावनीसमेत दिएको छ ।