नेपाल–भारत परराष्ट्रमन्त्रीस्तरीय बैठकमा नागरिक उड्डयन क्षेत्रका ६ विषयमा छलफल हुने गरी प्रस्ताव भएको छ ।  नेपाल–भारत संयुक्त आयोगको बैठकमा सहभागी हुन बिहीबार भारतीय विदेशमन्त्री एस जयशंकर नेपाल आउँदैछन् । 

सो क्रममा हुने दुई पक्षीय बैठकमा छलफलका लागि संस्कृति, पर्यटन तथा नागरिक उड्डयन मन्त्रालयको तर्फबाट प्रस्ताव तयार गरिएको हो । 

जसअनुसार भैरहवास्थित गौतम बुद्ध विमानस्थलमा जडान गरिएको आइएलएस सञ्चालनका लागि टेकनीकल कोर्डिनेशन टीमको बैठकको मिति निर्धारण गर्ने प्रस्ताव अघि सारिएको छ । 

यसैगरी तेस्रो देशको एयरलाइन्सहरूको लागि भैरहवा, नेपालगन्ज र महेन्द्रनगर हुँदै नेपाल प्रवेश गर्न नयाँ एयर रुटको लागि आग्रह गर्ने,  पोखरा अन्तर्राष्ट्रिय विमानस्थलबाट भारतको विभिन्न सहरहरूमा सीधा उडानको लागि अनुमति दिने प्रस्ताव गरिएको छ । 

यसैगरी बुद्ध एयरलाई भारतको अन्य सहरहरू पटना, लखनउ, गया, देहरादूनसँग पनि सीधा हवाई उडान अनुमतिको लागि अनुरोध गरिने भएको छ । 

यस्तै हिमालयन एयरलाइन्सलाई भारतमा उडान अनुमति दिनको लागि आग्रह गर्ने,  नेपाल वायुसेवा विमानलाई भैरहवाबाट दिल्ली र पोखराबाट दिल्ली सहित अन्य सहरहरूमा उडानको अनुमति दिन प्रस्ताव गर्ने तयारी भएको मन्त्रालयले जनाएको छ ।