लागुऔषधको मुद्दा मिलाइदिन भन्दै घुस लिइरहेको अवस्थामा नेपाल प्रहरीका एक प्रहरी नायब निरीक्षक (सई) पक्राउ परेका छन् । 

बर्दियाको बढैयाताल गाउँपालिका–६ मैनापोखरस्थित इलाका प्रहरी कार्यालयमा कार्यरत सई पवन साउदलाई अख्तियार दुरुपयोग अनुसन्धान आयोगले ३० हजार रुपैयाँ घुससहित पक्राउ गरेको हो । 

सई साउदले लागुऔषधको मुद्दा मिलाइदिने कार्यमा सहजीकरण गरिदिने प्रयोजनको लागि सेवाग्राहीसँग ३० हजार रुपैयाँ घुस माग गरेको पाइएको अख्तियारका प्रवक्ता नरहरि घिमिरेले बिहीवार जारी गरेको विज्ञप्तिमा उल्लेख छ ।

‘सई साउदलाई ३० हजार रुपैयाँ बिगो कायम गरी भ्रष्टाचार निवारण ऐन, २०५९ को दफा ३(१) (ख) बमोजिम कैद र विगो बमोजिम जरिवानाको मागदाबी लिई बिहीवार विशेष अदालत, काठमाडौंमा आरोपपत्र दायर गरिएको छ,’ विज्ञप्तिमा भनिएको छ ।