दोस्रो योनेक्स सनराइज इनास सब-जुनियर च्यालेन्ज कप राष्ट्रिय ब्याडमिन्टन प्रतियोगिता– २०८० को दोस्रो दिन शुक्रवार नेपाली सेनाको त्रिभुवन आर्मी क्लबका रिजन थापा मगर र धन्यन्तरी क्लबका सत्यम कार्की यू– १३ को अन्तिम क्वार्टरफाइनलमा प्रवेश गरेका छन् ।

मनमैजुस्थित दीपक ब्याडमिन्टन एकेडेमी (जीफोर)को कभर्ड हलमा जारी प्रतियोगिताअन्तर्गत यू– १३ एकल तर्फको खेलमा रिजनले अन्तराष्ट्रिय ब्याडमिन्टन विकास केन्द्रका अक्षत ढुंगेललाई २१–१३ तथा २१–८ ले पराजित गर्दै अन्तिम ८ मा स्थान बनाएका हुन् ।

यस्तै सत्यमले कास्कीका अमित थपालाई २१–१२ तथा २१–१३ ले पराजित गर्दै क्वार्टरफाइनलमा स्थान बनाउन सफल भएका हुन् ।

योनेक्सको नेपालका लागि आधिकारिक बिक्रेता इनासको आयोजनामा भएको प्रतियोगितामा स्पोर्ट्स हबका सदीप राई, एपीएफ क्लबका आरुष सिंखडा, तनहुँका सफल भुजेल, कैलालीका रियान्स चौधरी, आर्मीका सुदेश राजकोटी र पुलिस स्कूलका प्रनिश कार्की पनि अन्तिम ८ मा स्थान बनाउन सफल भएका छन् ।

प्रतियोगिताअन्तर्गत शुक्रवार ३५ जना खेलाडी प्रि–क्वार्टरफाइनलमा प्रवेश गरेका छन् ।

सदीपले दीपक ब्याडमिन्टन एकेडेमीका डियोन भण्डारीलाई २१–१९ तथा २१–५, आरुषले कैलालीका आदित्य चौधरीलाई २१–१५ तथा २१–१६, सफलले कपिलवस्तुका राज घिमिरेलाई २१–७ तथा २१–१४ ले हराएका छन् ।

यसैगरी रियान्सले आर्मीका दीप थिङलाई २१–१३ तथा २१–१४, सुदेशले महाबौद्ध क्लबका आरभ शाक्यलाई २१–५ तथा २१–७ ले र प्रनिशले प्रिन्स थापा मगरबाट वाक ओभर प्राप्त गर्दै अन्तिम ८ मा स्थान बनाएका हुन् ।

बिहीवार शुरू भएको प्रतियोगिता आइतवारसम्म चल्नेछ ।

काठमाडौंमा शुरूभयो सब-जुनियर च्यालेन्ज कप ब्याडमिन्टन, १५ वर्ष मुनिका खेलाडीको रोचक भिडन्त [भिडियोसहित]