नेकपा (एमाले) भ्रातृ संगठन युवा संघ नेपाल, रूपन्देही पर्यटन प्रवद्र्धन गर्न भन्दै बुटवलमा पदयात्रा (हाइकिङ) कार्यक्रम आयोजना गर्यो । कार्यक्रमका प्रमुख अतिथि थिए एमाले उपाध्यक्ष तथा पूर्वअर्थमन्त्री विष्णुप्रसाद पौडेल । उनी नेता–कार्यकर्तासहित बुटवलको बमघाटदेखि पाल्पाको वसन्तपुरसम्मको उकालो चढे । तीन घण्टा ‘हाइकिङ’मा हिँडेका पौडेलले आफ्नो चार दशकअघिको पैदलयात्रा स्मरण गरे ।

विस २०३७ सालमा पनि पौडेल बुटवलबाट हिड्दै वसन्तपुर पुगेका थिए । जतिबेला ‘जेल ब्रेक’पछि पाल्पा जाने क्रममा प्रहरी प्रशासनको आँखा छल्न आफू वसन्तपुर आएको पौडेलले बताए । ‘२०३७ भदौ १ गते हामी भैरहवा जेल ब्रेक गरेर भाग्यौं । जेलबाट निस्किएपछि रुपन्देहीबाट पाल्पा जाने शिलशिलामा हामीले दोभान प्रहरी चौकीलाई छल्नुपथ्¥र्यो,’ उनले भने, ‘अत्यन्तै सावधानीपूर्वक पाल्पाका गाउँहरूमा पुग्नुपथ्र्यो । असोजको पहिलो हप्तातिर बमघाटबाट वसन्तपुर भएर पाल्पाका गाउँहरूमा पुगेका थियौं ।’​

त्यसबेला पौडेलसँग दुईजना साथी थिए । हिरा शर्मा र नेतृ शान्ता मानवी  । ‘आजजस्तै हामीहरू बमघाटबाट उकालो चढ्यौं । झाडी र जंगल, छिचोल्दै यहाँ आइपुगेका थियौं,’ उनी थप्छन्, ‘पैदलयात्राका लागि तत्कालीन समयमा अहिलेजस्तो अनुकूलता पनि थिएन । यहाँ त्यसबेला अलि–अलि हरिया मकै पाइन्थे ।' त्यो बेला किसानमा घरमा पसेर पोलेका मकै हरियो खुर्सानीसँग खाएर झुम्साको बाटो गएको पौडेलले अनुभव सुनाए । 

पौडेलले संविधान निर्माणपछि देशलाई आर्थिक सामाजिक रूपले समृद्ध बनाउन पनि आफूहरूको मुख्य दायित्व भएको बताए । त्यसकै लागि पर्यटन प्रवद्र्धनका यस्ता कार्यक्रमले निरन्तरता पाउनुपर्ने उनको भनाइ थियो । यी सम्भावनाहरूलाई सही ढंगले सदुपयोग गरेमा रुपन्देही र आसपासका ठाउँ देशकै सर्वाधिक महत्वपूर्ण पर्यटकीय केन्द्र बन्ने उनको भनाइ छ ।

‘पर्यटकीय क्षेत्रको विकासका लागि एउटा बस्ती वा ठाउँ विशेषलाई नहेरी सम्भावना भएका ठाउँहरू एकअर्कामा अन्तरसम्बन्धित हुनुपर्छ । लुम्बिनी, तिलौराकोट, देवदह, जीतगढी किल्ला वसन्तपुर, केबलकार, सत्यवती, नुवाकोट, श्रीनगर लगायतका ठाउँसँग जोडेर पर्यटन प्रवद्र्धनको काम गर्नुपर्छ,’  उनले भने, ‘यी प्राकृतिक, धार्मिक, पुरातात्विक सांस्कृतिक सम्पदा जोडेर पर्यटन प्रवद्र्धनमा काम गर्न सकेमा रुपन्देही र पाल्पा देशकै सर्वाधिक महत्वपूर्ण पर्यटकीय केन्द्र बन्न सक्छ ।’ 

आयोजक राष्ट्रिय युवा संघ रुपन्देहीका अध्यक्ष विकासजंग बस्नेतले बुटवल र आसपासका पर्यटकीय स्थलहरूको प्रवद्र्धनका लागि पदयात्रा आयोजना गरिएको जानकारी दिए ।