बलियो अफगानिस्तानविरुद्ध नेपालले आईसीसी यू–१९ विश्वकपमा अन्ततः सनसनीपूर्ण जीत हासिल गर्दै सुपर सिक्समा प्रवेश पायो । समूह ‘डी’को रोमाञ्चक खेलमा नेपालले अन्ततः सकसपूर्ण रुपमा जीत हात पार्दै अर्को चरणमा खेल्ने सुनिश्चित गरेको हो । 

अघिल्ला दुवै खेलमा न्युजिल्यान्ड र पाकिस्तानसँग पराजय ब्यहोरेपछि नेपाल र अफगानिस्तान एक अर्कालाई हराएमात्रै सुपर सिक्समा प्रवेश गर्थे । यसैले दुवै टोलीका लागि अन्तिम खेल ‘गर या मर’को अवस्थामा थियो ।  

पहिले सिनियरजस्तै अहिले जुनियर टोलीमा पनि नेपालमाथि अफगानिस्तान सधैँजस्तो तगारो बन्दै आएको थियो । तर शुक्रवार भने टेस्ट मान्य प्राप्त राष्ट्रिय टोलीको जुनियर टीमलाई नेपालले स्तब्ध पारिदियो ।

दक्षिण अफ्रिकामा जारी प्रतियोगिताअन्तर्गत इस्ट लन्डनमा भएको उक्त निर्णायक खेलमा अफगानिस्तानले टस जितेर पहिले ब्याटिङ रोजेको थियो । तर नेपालले बलिङमा उत्कृष्ट प्रदर्शन गरेपछि अफगानिस्तानले १४५ रन मात्र बनायो । ‘लो स्कोरिङ म्याच’ (मात्र १४६ रनको लक्ष्य) हुँदा पनि नेपालले जित्नेमा सकस देखियो । तर अन्ततः नेपाल १ विकेटको रोमाञ्चक जीत दर्ता गर्न सफल भयो । प्रत्यक्ष खेल हेर्नेका लागि निक्कै सकसपूर्ण उतारचढावले भरिएको खेलमा मुख्यतः नेपालका चार खेलाडी मुख्य नायक बने । 

बलिङमा आकाश चन्दको सनसनी

पहिलो खेलमा पाकिस्तान र दोस्रो खेलमा न्युजिल्यान्डविरुद्ध ब्याटिङमा फिक्का देखिएको थियो अफगानिस्तान । तर नेपालविरुद्ध भने चुनौतीपूर्ण लक्ष्य दिने गरी पहिले ब्याटिङमा उत्रियो । चौथो बलदेखि नै अफगानिस्तानको विकेट पतनको शुरूआत भयो । ओपनर नुमन शाहलाई गुलसन झाले दीपक डुम्रेबाट क्याचआउट गराए । त्यसपछि मध्यम गतिका बलर आकाश चन्दको जादुयी बलिङ शुरू भयो । 

खालिद तनवाललाई शून्य रनमा आउट गरेर उनले अफगानिस्तानलाई २ रन २ विकेटको स्थितिमा पुर्याए । टीमको रन १७ हुँदा अर्का ओपनर जमशिद जद्रानको विकेट पनि आकाशले नै हात पारे । पूरा टीमले २७ रन बनाएर खेलिरहँदा आकाशले फेरि सोहेल खानको विकेट लिए । लगत्तै ३५ रनको स्थितिमा अफगानिस्तानका अलि अहमेदको विकेट पनि उनकै नाममा रह्यो । फेरि ११.३ ओभरमा ३५ बलमा २० रन बनाएर खेलिरहेका हसन इशाखिलको विकेट पनि आकाशले नै लिएपछि अफगानिस्तान दयनीय स्थितिमा पुग्यो । यो विकेटसँगै आकाशले गर्दै ५ विकेट पनि पूरा गरे । यो सनसनीपूर्ण बलिङ हो । बलियो मानिएको टीमलाई यसरी शुरूआतबाटै ४३–६ को स्थितिमा पुर्याएर धराशयी बनाउन चन्द​ले महत्वपूर्ण भूमिका निर्वाह गरे । उनी खेलको प्लेयर अफ दी म्याच पनि चुनिए ।

यसपछि भने एम घन्जानफर आक्रामक बन्न पुगे । उनले ४ चौका र ३ छक्कासहित २१ बलमा आक्रामक ३७ जोड्न पुगे । जसले अफगानिस्तान ४३–६ बाट ८५–७ को स्थितिमा पुग्यो । आक्रामक बनेका घन्जानफरको विकेट सुवास भण्डारीले लिएपछि नेपाल फेरि खेलमा फर्किने अवस्थामा देखियो । 

घन्जनाफर र नासिर खानले ४२ रन र नासिर खान र फरिद्दोन दावदजाइले ५५ रनको रनको पार्टनरसीप गरे । तर फेरि नेपाली बलर चम्किँदा अफगानिस्तान ४०.१ ओभरमै सबै विकेट गुमाएर १४५ रनमा समेटियो । 

ब्याटिङमा देव, दिपक र सुवास

अफगानिस्तानको कसिलो बलिङसामु नेपाललाई यही १४६ रनको लक्ष्य पनि सहज मान्ने अवस्था थिएन । किनकि, निर्णायक खेल भएकाले उत्तिकै दबाब पनि थियो । आशा गरिएका अर्जुन कुमाल १०, विपिन रावल २ र गुलसन झा १ रनमा आउट भएपछि नेपाल २४–३ को खराब अवस्थामा पुग्यो । यो किनै नै दबाबपूर्ण अवस्था थियो । 

तर कप्तान देव खनाल र आकाश त्रिपाठीले संयमतापूर्वक ब्याटिङ गर्दै ९० बलमा ४९ रनको महत्पूर्ण साझेदारी गर्न पुगे । त्रिपाठी ३९ बलमा १६ रन बनाएर आउट भए । तर उनले सुस्त खेलेर भए पनि विकेट जोगाए । जसले २४–३ बाट नेपाल ७३–४ को स्थितिमा पुग्यो । त्यसपछि ८६ मा ५ र ९१ रनमा छैठौं विकेट गुम्न पुगे । तर जमेर ब्याटिङ गर्न तम्सिएका कप्तान देव कत्ति पनि आत्तिएनन् । 

दिपक बोहोरासँग ५३ बलमा ३६ रनको साझेगरी गरेपछि नेपाल फेरि सहजै लक्ष्य तर्फ अघि बढ्यो । तर यही स्थितिमा कप्तान देव ८९ बलमा ५८ रन बनाएर आउट भए । यसपछि भने अफगानिस्तान खेलमा हाबी हुनेतर्फ अघि बढ्यो । किनकि खेल जित्न नेपाललाई अझै १९ रन आवश्यक थियो । खेलमा पुछारका ब्याटम्यान मात्रै बाँकी थिए । 

तर बोहोरा र सुवास भण्डारी नआत्तिकन टिकिरहे । ४१ बलमा २३ रन बनाएर खेलेका बोहोरोले ४१.१ ओभरमा चौका प्रहार गर्दा नेपाल १४० रनको स्थितिमा पुग्यो । किनकी अब दुई विकेट बाँकी हुँदा नेपाल जीतबाट ६ रनले मात्रै टाढा थियो । तर लगत्तैको बलमा २७ रन बनाएर खेलिरहेका बोहोरा बोल्ड हुन पुगे । भण्डारीसँग २९ बलमा १३ रनको साझेदारी तोडिएपछि भने खेलमा ट्वीस्ट आउने देखियो । किनकि, सेट भएका बोहोराको विकेट १४०–८ को स्थितिमा गुमेपछि खेलमा जे पनि हुने स्थिति उत्पन्न भयो । दिपकले ४२ बलमा २७ रन बनाउँदा ४ वटा चौका प्रहार गरे । सेट ब्याटसम्यान आउट भएपछि अफगानी बलर झन् हाबी हुने ठाउँ थियो । 

दिपक आउट भएपछि जित्नका लागि आवश्यक रन ६ र र विकेट २ थियो । दिपक आउट भएपछि आकाश चन्द र सुवास भण्डारीले लगातार १२ बल डट खेल्न पुगे । जसले झन् दबाब नेपाललाई बनाइदियो । ४३.३ ओभरमा चन्दले १ रन लिँदै स्ट्राइक सुवासलाई दिए । लगत्तै सुवासले बाउन्ड्री प्रहार गर्न खोजे तर दुई रन मात्रै आयो । पाँचौ बलमा सुवासले फेरि १ रन लिएपछि नेपाल १४४–८ को अवस्थामा पुग्यो । अब जीतका लागि २ र बराबरी हुन १ रन टाढा देखियो । २ विकेट बाँकी हुँदा यो अप्ठ्यारो नेपालतिर भन्दा अफगानिस्तानतिर सोझिन पुग्यो । तर ओभरको अन्तिम बलमा ८ बल खेलेर १ रन बनाएका चन्द आउट हुन पुगे । यसले खेलमा फेरि जे पनि हुन सक्ने स्थिति देखियो ।

जीतका लागि २ रन आवश्यक हुँदा नेपालसँग १ विकेट मात्रै बाँकी रह्यो । चन्दको विकेट अन्तिम बलमा गुमेपछि ४४ औँ ओभरको पहिलो बल खेल्ने अवसर सुवासले पाए । धेरै बल खेलेर सेट भएकोले अर्कोतिर भएका तिलक भण्डारीभन्दा सुवासले बल खेल्न पाउँदाको फाइदा नेपाललाई हुन पुग्यो । ओभरको पहिलो बल अफगानी बलर अरब गुलले वाइड फ्याँके । जसले खेललाई बराबरीमा पुर्यायो । 

यस्तोमा खेल नेपालले नहार्ने तर सुपरओभरमा जान सक्ने स्थिति बन्यो । अर्कोतिर अफगानिस्तान जीतबाट टाढा देखियो । त्यसपछि अफगानी फिल्डरले घेर्दा पनि सुवासले आत्मविश्वास देखाएर लगातार ३ बल डट खेले । यतिखेरसम्म पनि खेल जे पनि हुन सक्ने स्थितिमा पुग्यो । तर चौथो बललाई स्लीपबाट निकालेर बाउन्ड्रीतिर दिशा दिन सुवास सफल भए अनि नेपालले रोमाञ्चक १ विकेटको जीत हात पार्यो । २९ बलमा ९ रन मात्र बनाउनका बाबजुद नेपाललाई जीतसम्म डोहोर्याउने निर्णायक नायक अन्ततः सुवास बन्न पुगे । 

अब सुपर सिक्समा नेपालले भारत र बंगलादेशसँग खेल्नेछ ।