​​​काठमाडौंको धुम्बाराहीमा नेपालकै पहिलो पारिवारिक मनोरञ्जन पार्कको सञ्चालनमा आएको छ ।

करिब १ महिना अगाडिदेखि सञ्चालनमा आएको उक्त पार्कको सोमवार अभिनेत्री प्रियंका कार्कीले औपचारिक उद्घाटन गरेकी छिन् ।

एक औपचारिक कार्यक्रमका बीचमा उद्घाटन भएको ‘उप्स’मा बच्चादेखि सिनियरसम्मले खेलको मनोरञ्जन लिन सक्नेछन्।

आर्केड, रिडेम्सन, भर्चुअल रियालिटी, सुटिङ्ग, रेसिङ्ग, जिपलाईन, क्लाइम्बिङ्ग लगायत इण्डूअर र आउटडूअर खेलहरूको मनोरन्जन पार्कमा लिन सकिनेछ।

पार्कको मुख्य विशेषता भनेको सस्तो मूल्यमा धेरै खेलहरू एकैठाउँमा खेल्ने अवसर दिनु हो । साथै स-परिवार एकसाथ रुपमा पार्कमा गएर समय व्यतीत गर्न सकिनेछ।

सञ्चालक टिमलाई शुभकामना दिन गायिका इन्दिरा जोशी आफ्ना श्रीमान्‌सँगै पुगेकी थिइन् । कार्यक्रममा बोल्दै प्रियंकाले सबै प्रकारका खेलहरू खेल्न सकिने ठाउँ आकर्षक बनेको बताइन्। प्रियंका भन्छिन्, ‘सबै परिवार नै मिलेर खेल्न सकिने विभिन्न प्रकारका खेलहरू एकै ठाउँमा पाए। ठूलो स्पेसमा भएको कारण पनि धेरैले एकसाथ खेलको मज्जा लिन पाउनुहुनेछ।'

छोरी आयंकासँग पुगेकी प्रियंकाले चाँडैनै श्रीमान् आयुष्मान देशराज जोशी र परिवार नै लिएर आउने प्रतिबद्धता जनाइन् ।