रेशम चौधरी नेतृत्वको नागरिक उन्मुक्ति पार्टीको पहिलो केन्द्रीय सचिवालयको बैठक शनिवार बसेको छ ।  इलामको चुलाचुली गाउँपालिका वडा नम्बर ४ स्थित आइतबारेमा बसेको बैठकले विभिन्न ४ वटा निर्णय गरेको छ । 

जसअनुसार प्रदेश नम्बर १ को नामकरणलाई लिएर भइरहेको पहिचानवादीहरूको आन्दोलन प्रति ऐक्यबद्धता जनाउने निर्णय भएको छ ।  प्रदेश सरकारले नामकरण गरेको कोशी नाम खारेजीको पक्षमा सो पार्टी उभिएको छ । त्यसका पहिचानको आधारमा नाम झल्काउने गरी कोचिला, किरात, लिम्बुवान प्रदेश (कोकिली) नामकरणका लागि पहल गर्ने निर्णय भएको चौधरीको भनाइ छ । यस्तै प्रदेश १ को नामाकरणबारे पहिचानवादी संघसंस्था र सबै राजनीतिक दलहरुसँग निरन्तर छलफल गर्ने चलाउने निर्णय पनि भएको छ । 

यसैगरी २०८१ मा हुने संघ, प्रदेश र स्थानीय तहको उपनिर्वाचनमा पार्टीको तर्फबाट उम्मेदवारी दिने, केन्द्रीय महासमिति सदस्य विस्तारिकण समानुपातिक समावेशी बनाउने र  भूमि (जग्गा) मा देखिएको समस्या समाधानका लागि पार्टीको तर्फबाट विज्ञहरूको टोली गठन गरेर आवश्यक पहलकदमी लिने निर्णय भएको छ ।