मोरङको ग्रामथान गाउँपालिका अध्यक्ष जयप्रकाश गच्छदार थारूलाई राजीनामा गराउन कांग्रेसले छलफल थालेको छ । राष्ट्रियसभा निर्वाचनको अघिल्लो दिन अर्थात् माघ १० गते विराटनगरको एक होटलमा कांग्रेसको भेलामा उनी ढलेका थिए । उनको नोबेल मेडिकल कलेजको आईसीयूमा उपचार भइरहेको छ ।

गठबन्धनका उम्मेदवार जिताउन भन्दै कांग्रेसले भेला आयोजना गरेको थियो । स्ट्रनस्टार होटलमा खाना खाने लाइनमा बसेका थारू साँझ ७ः १० बजेतिर ढलेर बेहोस् भएका थिए । 

ढलेपछि नेताहरूले नोबेल अस्पतालमा उपचार गर्न लगेका थिए । अस्पताल प्रशासनका अनुसार उनी अहिलेसम्म पनि अचेत अवस्थामै छन् ।  अध्यक्ष बिरामी भएपछि उपाध्यक्ष गुणावति थारूले कार्यबाहकको जिम्मेवारी पाएकी छन् । तर, उनी एमालेबाट निर्वाचित जनप्रतिनिधि हुन् । जयप्रकाश कांग्रेसबाट निर्वाचित भएका थिए । 

कांग्रेसले कार्यवहाक एमालेलाई नदिने भन्दै गच्छदारलाई राजीनामा गराएर चुनाव गर्ने रणनीति अपनाएको  छ । ‘अध्यक्षको अहिलेको स्वास्थ्य अवस्था र चिकित्सकको भनाइअनुसार उहाँ सन्चो भएर गाउपालिकाको नेतृत्व गर्ने सम्भावना कम छ,’ काग्रेसका एक नेताले भने, ‘त्यहाँ उपाध्यक्ष एमालेको हुनुहुन्छ । एमालेलाई किन कार्यवहाक दिने ? अध्यक्षलाई राजीनामा दिन लगाएर उप निर्वाचन गर्नुपर्छ भन्नेगरी छलफल चलिरहेको छ ।’

गत स्थानीय निर्वाचनमा गच्दार ७ हजार ६०५ मत ल्याएर निर्वाचित भएका थिए । उनले एमालेका शिवनारायण माझीलाई (६ हजार ९३ मत) हराएका थिए । 
उनलाई राजीनामा गराएर उपनिर्वाचनमार्फत् चुनाव जित्ने रणनितिमा कांग्रेस छ । निर्वाचित जनप्रतिनिधिले राजीनामा दिएको खण्डमा ६ महिनाभित्र उप निर्वाचन गर्नुपर्ने कानूनी प्रावधान छ । 

ग्रामथानमा उप निर्वाचन हुँदासमेत चुनाव जित्ने कांग्रेस नेताहरूको विश्लेषण छ । अध्यक्षको बोल्ने अवस्था नभए पनि सेन्स भने रहेको कांग्रेस मोरङका उपसभापति भक्ती माझीले बताए  । ‘एक/दुई महिना नहेरी राजीनामा दिन लगाउने कुरा भएन,’ उपसभापति माझीले भने  ‘निर्वाचति जनप्रतिनिनिधि हो । हतारहतार राजीनामा दिनुहोस् भन्न मिलेन । तर राजीनामाको विषयमा चर्चा चाहिँ चल्न थालेको छ ।’ उनले राजीनाको विषयमा चलेको चर्चा स्वाभाविक पनि भएको बताए ।

‘परिस्थिति र डाक्टरको रिर्पोट हेरेर ६ महिनासम्म पनि रिकभर भएन औपचारिक छलफल हुन्छ । उहाँ अहिले पुरै हाइली रिक्समा हुनुहुन्छ । रिकभरता हुन्छ होला तर, समय लाग्छ,’ उनले भने । उपाध्यक्ष गुणावतिले भने पनि बेहोस अवस्थामा अध्यक्षलाई राजीनामा दिनु नहुने बताइन् ।