यही फागुन २८ र २९ गते लुम्बिनीमा हुने भनिएको ‘अन्तर्राष्ट्रिय लौरियट एन्ड लिडर्स शिखर सम्मेलन’  सत्ता समीकरण फेरबदलसँगै  अन्योलमा परेको छ । केन्द्रको सत्ता समीकरण परिवर्तनसँगै त्यसको असर प्रदेश सरकारमा पनि देखिने भएकोले शिखर सम्मेलन अन्योलमा परेको हो । 

मुख्यमन्त्री डिल्ली बहादुर चौधरीले अन्तर्राष्ट्रिय गैरसरकारी संस्थाको नाममा करोडौँ बजेट शिखर सम्मेलनमा खर्च गर्न लागेको भन्दै उनीमाथि चौतर्फी प्रश्न उठेका थिए । प्रदेश सरकारका गृहमन्त्री सन्तोषकुमार पाण्डेयले सत्ता समीकरण परिवर्तनसँगै सम्मेलन हुने नहुने अझै टुंगो लाग्न बाँकी रहेको बताए । ‘संघ सरकारको भोलिको क्याबिनेटका निर्णयको आधारमा भर पर्छ । नहुने सम्भावना पनि पनि छ , पाण्डेयले भने । 

शिखर सम्मेलनका लागि लुम्बिनी प्रदेश सरकारले वन तथा वातावरण मन्त्रालयमार्फत ६ करोड ५० लाख रुपैयाँ बजेट विनियोजन गरेको छ । प्रदेश सरकारको कार्यसम्पादन राम्रो नभएको भन्दै केन्द्रले दिने बजेटको सीमामा समेत गिरावट आएको बेला करोडौँ बजेट सम्मेलनको नाममा खर्च गर्नु उचित नभएको कतिपयको भनाइ छ ।