नेकपा (माओवादी केन्द्र)का उपमहासचिव वर्षमान पुन अर्थमन्त्री बनेका छन् ।

प्रधानमन्त्री पुष्पकमल दाहाल ‘प्रचण्ड’को सिफारिशमा राष्ट्रपति रामचन्द्र पौडेलले बुधबार पुनलाई अर्थमन्त्रीमा नियुक्तिका लागि राष्ट्रपतिसमक्ष सिफारिश गरेका हुन् ।

अर्थ मन्त्रालयमा पुनको यो दोस्रो आगमन हो । 

२०६८ सालमा डा. बाबुराम भट्टराई सरकारमा पुन १८ महिना अर्थमन्त्री बनेका थिए । अर्थमन्त्री बने पनि उनले बजेट ल्याउन पाएका थिएनन् ।

संवैधानिक जटिलताका कारण बाबुराम सरकारले नयाँ बजेट ल्याउन नपाई पुरानो बजेट कार्यान्वयन गरेको थियो । पुन अर्थमन्त्री रहेको समयमा सरकारले २१ वटा महत्त्वाकांक्षी परियोजनालाई राष्ट्रिय गौरवका आयोजना नामकरण गरेको थियो । 

प्रतिनिधि सभा विघटनअघि नेकपा एमालेका अध्यक्ष केपी ओली नेतृत्वको सरकारमा पुन ऊर्जा, जलस्रोत तथा सिँचाइ मन्त्री थिए ।

पहिलो संविधानसभामा ललितपुर– १ बाट चुनाव जितेका पुन प्रतिनिधि सभाका पछिल्ला दुई निर्वाचनमा रोल्पाबाट निर्वाचित हुँदै आएका छन् ।