बिहीवार भएको बोलेरो जीप दुर्घटनामा एकै परिवारका ३ सहित एउटै पालिकाका ७ जनाको मृत्यु भएको छ । यस घटनाबाट भोजपुरको हतुवागढी गाउँपालिका शोकमा डुबेको छ ।  दुर्घटनाबाट मृत्यु हुने ८ मध्ये ७ जना हतुवागढीका भएको जिल्ला प्रहरी कार्यालय उदयपुरका प्रहरी उपरीक्षक रमेश थापाले बताए । 

मृत्यु हुनेमा हतुवागढी– २ दितेनीका चन्द्रप्रकाश राई, पर्वतमाया राई, डिसाङ राई, हतुवागढी–की ५ रामकुमारी राई र किसन राई रहेका छन् । 

सवारीचालक हतुवागढी– २ कै मानबहादुर बस्नेत रहेको प्रहरीले जनाएको छ । हतुवागढी– ९ का पदमबहादुर थापा र सुनसरीको इटहरी घर भएकी कमला अधिकारीको पनि मृत्यु भएको प्रहरीले जनाएको छ । 

मृतकमध्ये दितेनीका ७० वर्षीया पर्वतमाया राई उनका छोरा २३ वर्षीय चन्द्रप्रकाश र  शान्तिकला राईका ६ महिने छोरा डिसाङ रहेका छन् । 

गम्भीर घाइते भएकी ३२ वर्षीया शान्तिकला पर्वतमायाकी छोरी हुन् । उनको  धरानस्थित बीपी कोइराला स्वास्थ्य विज्ञान प्रतिष्ठान (घोपा क्याम्प)मा उपचार भइरहेको छ । एउटै परिवारका तीन जनाको मृत्युले सिंगो दितेनी शोकमग्न बनेको छ । 

दुर्घटनामा हतुवागढी गाउँपालिका– ५ का रामकुमारी राई र किसन राई, हतुवागढी– ९ का पदमबहादुर थापाको पनि मृत्यु भएको छ । दुर्घटनाले सिंगो गाउँपालिकालाई शोकमग्न बनाएको हतुवागढी– ९ का वडाध्यक्ष सञ्जल राईले बताए । 

सुनसरीको धरानबाट १६ जना यात्रु बोकेर भोजपुरको घोरेटारतर्फ हिँडेको बोलेरो जीप अनियन्त्रित भई उदयपुरको बेलका नगरपालिका ७, मैनामैनीमा सडकभन्दा ४०० मिटर तल खसेर दुर्घटनाग्रस्त भएको थियो । 

नाैजना घाइतेको धरानस्थित घोपा क्याम्पमा उपचार भइरहेको छ ।  

उदयपुर दुर्घटना अपडेटः मृत्यु हुनेको संख्या ८ पुग्यो