नेपाली जनप्रगतिशील मञ्च युरोपको अध्यक्षमा बेल्जियम निवासी चित्र सुवेदी चयन भएका छन्। 

स्पेनको बार्सिलोनामा सम्पन्न ५औं अधिवेशनमार्फत सुवेदी अध्यक्षमा चयन भएका हुन् ।

दुई दिनसम्म चलेको अधिवेशन कार्यक्रम बन्द शत्रमा प्रवेश गरेपछि निर्वाचन आयुक्त सुरेन्द्र कुमार श्रेष्ठले अध्यक्षका चारजना दाबेदारको नाम पढेर सुनाएका थिए। 

अध्यक्षका लागि मञ्च विघटन हुनु अगाडिका कार्यबाहक अध्यक्ष रणबहादुर खाती क्षेत्री, संगठन विभाग प्रमुख उदयराज गौतम, बेल्जियमका पूर्व अध्यक्ष चित्र सुवेदी, अष्ट्रियका अध्यक्ष  धर्मराज  खतिवडा  लगायतको  दाबी थियो। 

अध्यक्षका दाबेदारहरूबीच छलफलपश्चात मञ्चको अध्यक्षका लागि चित्र सुवेदीका नाममा सहमति जुटेको थियो भने धर्मराज खतिवडा महासचिव बन्न राजी भएका थिए ।

आफूले अध्यक्षको दाबेदारी फिर्ता लिएपछि वरिष्ठ नेता उदयराज गौतमले 'संगठनको आवश्यकता र समयको मागअनुसार आफूले पदलाई गौण ठानेको  बताए।

आफ्नो योगदानअनुसार अध्यक्षका निम्ति एकपटक प्रयास गर्न खोजेको तर नेतृत्वमा पुग्नका लागि निर्वाचनमा सहभागी हुन मन नलागेको उनको भनाइ थियो ।

नेतृत्वमा जो गए पनि सबै वर्ग, समुदायका निम्ति त्यसले हित गर्ने उनले बताए ।

त्यसैगरी  रणबहादुर खाती क्षेत्रीले आफू यस अगाडि संगठनको आवश्यकताका लागि कार्यबाहक अध्यक्ष  बनेका कारण यसपटक आफू स्वत: अध्यक्ष बन्नुपर्ने बताएका थिए। तर, निर्वाचनमा जाने कुराले कसैलाई फाइदा नगर्ने भन्दै उनी पछाडि हटेका थिए ।

नवनिर्वाचित महासचिव धर्मराज खतिवडाले आफ्नो केमेस्ट्री अध्यक्षसँग मिल्ने भएकाले अब संगठन रकेटको गतिमा अगाडि बढ्ने बताए । 

महाधिवेशनले कार्यसमितिका अन्य पदहरू सहमतिका आधारमा परिपूर्ति गर्दै जाने नवनिर्वाचित अध्यक्ष चित्र सुवेदीले बताएका छन् ।