भारतको सीमावर्ती बजार जोगवनीमा भन्सार र प्रशासनले पुनः कडाइ गर्न थालेको छ । भारतीय बजारबाट सामान खरिद गरेर आउने उपभोक्ताहरूलाई भन्सार र प्रशासनले कडाइ गर्न थालेको हो । 

सीमावर्ती बजारबाट एक सय रुपैयाँभन्दा बढीको सामान खरिद गरेर ल्याउँदा अनिवार्य भन्सार तिरिनुपर्ने नियम बनाइएको छ । यसअघि उपभोक्ताले आवश्यक वस्तु सहजै भन्सार नतिरी ल्याउने गरेका थिए । अहिले भने भन्सार कार्यालयले सूचना नै निकालेर सय रुपैयाँभन्दा बढीको सामानको अनिवार्य भन्सार तिर्नुपर्ने नियम लागू गरेको हो ।

एक सातादेखि घरेलु प्रयोजनका लागि उपभोग्य वस्तु किन्न जोगवनी बजार जाने सर्वसाधारणलाई सय रुपैयाँ भन्दा बढीको सामान ल्याउन दिइएको छैन । नयाँ सरकार बनेलगत्तै भारतीय बजारबाट ल्याइने सामानमा कडाइ गरिएको हो ।

यसअघि साउन १ गतेदेखि यस्तै कडाइ गरिएको थियो । तर, स्थानीयको आक्रोश बढेपछि त्यो निर्णय एक साता पनि टिक्न सकेको थिएन । एक सय रुपैयाँभन्दा बढी मूल्यका सामान बोकेर आउने सर्वसाधारणलाई भन्सारको निर्देशनअनुसार नाकामा खटिएका सशस्त्र प्रहरीले उतै फर्काउने गरेका छन् । 

भन्सारको कडाइपछि सर्वसाधारण र सीमामा खटिएका सुरक्षाकर्मीबीच सातादेखि दिनहुँ लछारपछार भइरहेको गुनासो छ । तर, स्थानीयले भने सर्वसाधारलाई मात्रै कानुन लाग्ने गरेको भन्दै दुखेसो गरेका छन् । 

सुनसरीको इटहरीबाट दैनिक उपभोग्य सामान किन्न बिहीबार नाका पुगेकी मैया थापाले सर्वसाधारणलाई कानून र पहुँचवालालाई सेटिङ हुने गरेको आरोप लगाइन् । 
भन्सार शूल्क, मूल्य अभिवृद्धि कर (भ्याट) र अन्तशूल्कका कारण स्थानीय बजारमा उपभोग्य वस्तु महँगो पर्ने भन्दै उपभोक्ताहरू दैनिक उपभोग्य सामान किन्न जोगवनी बजारमा ओइरिँदा विराटनगरलगायत स्थानीय बजार सुनसान बनेका थिए । 

सर्वसाधारणलाई जोगवनीबाट सामान ल्याउन कडाइ गर्दा विराटनगर र आसपासका बजारको प्रवर्द्धन हुने र भन्सार राजश्व संकलनमा पनि सहयोग पुग्ने विराटनगर भन्सार प्रमुख ज्ञानेन्द्र ढकालले बताए । 

विराटनगर भन्सारले गरेको नाकाको कडाइलाई मोरङ व्यापार संघले स्वागत गरेको छ । सरकारले राजश्व असुलीका नाममा चिनी, दाल, चामल, लत्ताकपडा, काजु, किसमिस, जिरा, धनिया, भुजिया, विस्कुट, खानेतेल, चियापत्ती, साबुन, कफीलगायत दैनिक उपभोग हुने मुख्य १९ वस्तुको अवैध आयात अनियन्त्रित भइरहेको जनाएको छ ।