दिल्लीका मुख्यमन्त्री अरविन्द केजरीवाललाई मदिराको अन्तःशुल्कमा नीतिगत भ्रष्टाचारसँग जोडिएको सम्पत्ति शुद्धिकरण मुद्दामा भारतको प्रवर्तन निदेशालय (इडी)को कार्यालयमा लगिएको छ ।

दिल्लीका मुख्यमन्त्री अरविन्द केजरीवाललाई उक्त घोटालामा गिरफ्तार गरिएकोविरुद्धमा जर्मनीले टिप्पणी गरेपछि भारतले आन्तरिक मामिलामा हस्तक्षेप भएको भन्दै कडा आलोचना गरेको छ ।

केजरीवाल पक्राउ परेपछि जर्मन विदेश मन्त्रालयका प्रवक्ताले गरेको टिप्पणीमा भारत आक्रोशित बनेको हो ।

'हामीले नोट गरेका छौं, भारत एक लोकतान्त्रिक देश हो । यस मामिलामा न्यायपालिकाको स्वतन्त्रता र आधारभूत लोकतान्त्रिक सिद्धान्त सम्बन्धी मापदण्डहरू पनि लागू हुनेछन् भनी हामी अनुमान र अपेक्षा गर्छौं,’ जर्मन विदेश मन्त्रालयका प्रवक्ताले भनेका थिए ।

उनको यही भनाइलाई लिएर भारत-जर्मनी सम्बन्ध अहिले तनावपूर्ण स्थितिमा पुगेको छ ।

भारतको विदेश मन्त्रालयले जर्मन दूतावासका डेपुटी हेड अफ मिशन, जर्ज एन्जवेलरलाई बोलाएर स्पष्टिकरण लिएको भारतीय सञ्चारमाध्यमहरूले जनाएका छन् ।

जर्मनीको विदेश मन्त्रालयको भनाइलाई भारतले 'भारतको आन्तरिक मामिलामा स्पष्ट हस्तक्षेप' भनी टिप्पणी गरेको छ ।

विदेश मन्त्रालयले जारी गरेको एक विज्ञप्तिमा भनिएको छ, 'आरोपको सामना गर्ने सबैले निष्पक्ष परीक्षणको हकदार छन् । यसमा केजरीवालले पनि प्रतिबन्धबिना सबै उपलब्ध कानुनी मार्गहरू प्रयोग गर्न सक्छन् । निर्दोषताको अनुमान कानूनको शासनको एक केन्द्रीय तत्व हो ।'

शुक्रवार केजरीवाललाई सात दिनका लागि ईडी हिरासतमा पठाइएको थियो । उनलाई दिल्ली अन्तः शुल्क नीति र त्यसैसँग जोडिएको सम्पत्ति शुद्धिकरण मुद्दाको अनुसन्धानका लागि इडीले पक्राउ गरेको हो ।

केन्द्रीय एजेन्सीले बिहीबार राति पक्राउ गरेपछि दिल्लीका केजरीवाललाई राउज एभिन्यू अदालत पेश गरिएको थियो । उक्त अदालतका सीबीआई न्यायाधीश कावेरी बावेजाले केजरीवाललाई ७ दिनको हिरासतमा राख्न अनुमति दिएको हो ।